Рамазон ойининг фазилатлари баён этилган ҳадиси шарифда бундай дейилади: “Бу ойда мўминнинг ризқи зиёда бўлади. Кимда ким шу ойда рўза тутганга ифторлик қилиб берса, унинг гуноҳлари кечирилади ва дўзахдан озод бўлади. Шунингдек, унга ҳам рўза тутганнинг савобидан ҳеч кам бўлмаган савоб берилади”. Демак, ким рўзадорнинг қорнини тўйдирса, Қиёматда Аллоҳ унга кавсар кўлидан бир қултум сув ичиради, натижада у жаннатга киргунча чанқамайди.

Ифторлик деганда, албатта, дастурхон ёзиб, кўп одам чақиришни тушунмаслик керак. Ёрдамга муҳтож одамларга таом ёки керакли маблағни бериш энг яхши ифторлик ҳисобланади.

Рамазон ойи муносабати билан Қорақалпоғистон Республикаси Вазирлар Кенгаши ва Қорақалпоғистон мусулмонлари қозиёти вакиллари, имом-хатиблар,  нуронийлар, маҳалла фаоллари жойлардаги муҳтож оилалар, кекса ёшдаги нуронийлар ва ногиронлиги бўлган фуқаролар ҳолидан хабар олиб, ҳомийлар кўмаги билан уларга моддий ёрдамлар берилмоқда.

Аллоҳ таоло тутаётган рўза, тоат-ибодат ва хайрли амалларимизни даргоҳида қабул айлаб, барчамизни улуғ савобларга эриштирсин!

Бегис АББАЗОВ,

Қорақалпоғистон мусулмонлари қозиёти ходими