16 январь куни "Кўкалдош" ўрта махсус ислом билим юртида таниқли диний уламо Шайх Юсуфхон тўра Шокиров таваллудининг 100 йиллиги муносабати билан маънавий-маърифий тадбир ташкил этилди.

Тадбир бошида билим юрти талабалари томонидан тайёрланган Шайх Юсуфхон тўра Шокиров ҳаёти ва илмий фаолиятига бағишланган "Илм ва маърифат йўлида кечган умр" мавзусидаги видео ролик намойиш этилди. Мазкур лавҳа тадбир иштирокчиларида чуқур таассурот қолдирди.

Мазкур тадбирга алломанинг ўғли, Ўзбекистон мусулмонлари идорасида узоқ йиллар самарали хизмат қилган Муҳаммад Акмалхон Шокиров фахрий меҳмон сифатида таклиф этилди.

Тадбирни билим юрти маънавий ва маърифий ишлар бўйича мудир ўринбосари А. Ғаниев кириш сўзи билан очиб берди. У ўз нутқида Шайх Юсуфхон тўра Шокировнинг илм-маърифат ривожидаги ўрни ва диний соҳадаги фидокорона хизматларини алоҳида таъкидлади ҳамда сўзни меҳмон — Муҳаммад Акмалхон Шокировга тақдим этди.

Муҳаммад Акмалхон Шокиров ўз нутқида оталари — Шайх Юсуфхон тўра Шокировнинг ҳаёт йўллари, илмга бўлган муҳаббатлари ва ибратли фаолиятлари ҳақида қимматли хотиралар билан ўртоқлашди. Шунингдек, толиби илмлар учун илм олишнинг фазилати, одоб-ахлоқ ва масъулият масалаларида муҳим маслаҳатлар бердилар.

Муҳаммад Акмалхон Шокировнинг нутқидан сўнг билим юрти катта ўқитувчиси Ж. Холмўминов сўзга чиқиб, Шайх Юсуфхон тўра Шокировнинг илм йўлидаги машаққатли фаолияти, шунингдек, у зотнинг шогирдлари томонидан билдирилган эътирофлар ҳақида атрофлича тўхталиб ўтди.

Тадбир якунида Қуръони карим тиловат қилиниб, юртимизда илм йўлида умрларини бағишлаб ўтган алломалар ҳаққига, шунингдек, Ватанимизда тинчлик ва осойишталик бардавом бўлишини сўраб дуо-хайрлар қилинди.

Билим юрти Матбуот хизмати