Cавол: 100 марта астағфируллоҳ айтгандан кейин қандай дуо қилинади?
Жавоб: Бисмиллаҳир Роҳманир Роҳийм. Истиғфор, шу каби салавот ва тасбеҳлардан кейин муайян бир дуони ўқиш буюрилмаган. Лекин дуо айни ибодат саналади. Уни ҳар қандай муносиб ҳолатларда қилиш жоиз. Жумладан, савобли амаллар: намоз, рўза, зикру тасбеҳлар каби ибодатлардан кейин дуо қилинса, ижобатга яқин бўлади. Истаса ушбу зикру тасбеҳларининг савобини кимгадир бағишлайди.
Демак, истиғфор ва зикру тасбеҳлардан кейин дуо қилиш шарт эмас, лекин дуо қилмоқчи бўлса, бунга монеълик йўқ. Дуо қилгани учун алоҳида савоб олади. Валлоҳу аълам.
Ўзбекистон мусулмонлари идораси
Фатво маркази.
Давлатимиз Раҳбарининг «Рамазон – саховат, бирдамлик ва бағрикенглик ойи» ғояси асосида айни кунларда вилоятимизда саховат тадбирлари изчил давом этяпти.
Бу жараёнда ўзга миллат, бошқа дин вакилларига ҳам алоҳида эътибор қаратилмоқда.
Шу йил 16 март куни Рамазоннинг 16-куни (16 март) Оҳангарон тумани бош имом-хатиби Ҳусниддин домла Бойниёзов бошчилигида тумандаги имом-хатиблар иштирокида кам таъминланган, боқувчисини йўқотган, ногирон парваришланаётган 36 та оила ҳолидан хабар олинди.
Ҳомийлар кўмагида уларнинг ҳар бирига 300 минг сўмлик, жами 11 миллион сўмлик озиқ-овқат маҳсулотлари етказиб берилди.
Улар орасида рус, татар, корейс миллатига мансуб хонадон вакиллари ҳам бор.
Аллоҳ таоло марҳамат қилади: «Бирор нарсани (муҳтожларга холис) эҳсон қилсангиз, бас, (Аллоҳ) унинг ўрнини тўлдирур. У ризқлантирувчиларнинг яхшисидир» (Сабаъ сураси, 39 оят).
Пайғамбаримиз соллаллоҳу алайҳи васаллам эса: «Жоним измида бўлган Зотга қасам, садақа билан мол камаймайди», деганлар (Имом Термизий ривояти).
Аллоҳ таоло эҳсонларни қабул қилсин!
Ўзбекистон мусулмонлари идораси
Тошкент вилояти вакиллиги
Матбуот хизмати