Ўзбекистон Республикаси Президенти Шавкат Мирзиёев расмий ташриф доирасида Малайзия Ислом санъати музейига ташриф буюрди.
Таъкидлаш жоизки, ушбу мажмуа мамлакатнинг энг йирик музейларидан бири ҳисобланади. У 1998 йилда ташкил этилган.
Музей анъанавий ислом меъморчилиги услубида барпо этилган бўлиб, унинг умумий майдони 30 минг квадрат метрдан зиёдни ташкил этади.
Бино гумбазининг ички қисмини безаш ва реставрация ишларида ўзбекистонлик усталар иштирок этган.
Бу ерда 10 мингдан ортиқ ислом санъати намуналари сақланмоқда. Доимий экспозицияда Қуръон қўлёзмаларининг ноёб тўплами, сопол ва қимматбаҳо буюмлар, қурол-яроғ намуналари ва иншоотлар макетлари, тақинчоқлар, тангалар ва бошқа ашёлар намойиш этилмоқда.
Музей фондида замонавий Ўзбекистон ҳудудида турли тарихий даврларда яратилган 200 га яқин ноёб экспонатлар алоҳида ўрин эгаллайди. Улар орасида ўрта асрларга оид қўлёзмалар, заргарлик буюмлари, машҳур абр матолари ва кийим намуналари, Шарқ Ренессансига оид кулолчилик буюмлари мавжуд.
Давлатимиз раҳбари экспонатларни кўздан кечириш чоғида биргаликда тадқиқотлар ўтказиш ва кўргазмалар ташкил этиш, илмий ва маданий алмашинувни кенгайтириш муҳимлигини таъкидлади.
President.uz
Ўзбекистон мусулмонлари идораси Қашқадарё вилояти вакиллиги ташаббуси билан Ўзбекистон мусулмонлари идораси раиси, муфтий Шайх Нуриддин Холиқназар ҳазратларининг қаламига мансуб “Фиқҳ ва ақидага оид ихтилофли масалалар ечими” китоби асосида имом-хатиблар ўртасида илмий-маърифий заковат мусобақаси ташкил этилди. Тадбирда шаҳар ва туманларда хизмат қилаётган диний соҳа вакиллари иштирок этди.
Мусобақанинг асосий мақсади — мазкур китоб орқали имом-хатиблар билимларини бойитиш, фиқҳ ва ақида соҳасида учрайдиган ихтилофли масалаларга аниқ ва мантиқий ечим топиш кўникмасини мустаҳкамлашдан иборат бўлди.
Мусобақада 5 та гуруҳдан иборат 30 нафар имом-хатиблар иштирок этишди. Иштирокчилар китобда баён этилган фиқҳий масалалар, ақидавий қоидалар, уламолар фикри ва уларнинг далиллари асосида тайёрланган мукаммал шарҳ талаб этувчи саволларга жавоб бериш билан баҳоландилар.
Беллашув жуда қизғин руҳда ўтди. Юқори савияда тайёргарлик кўрган жамоалар ўртасида тортишувли баҳслар, далиллар келтириш ва илмий мулоҳазалар билан бойиган баҳолаш жараёни барча иштирокчилар учун катта тажриба бўлди.
Мусобақа якунига кўра ғолиб ва фаол иштирокчилар диплом ва қимматбаҳо эсдалик совғалари билан тақдирланди. Тадбир масъулларининг қайд этишича, бундай илмий мусобақалар имом-хатибларнинг билим ва маҳоратини ошириш, жамоат орасидаги эътиқодий барқарорликни таъминлашда муҳим аҳамият касб этади.
ЎМИ Қашқадарё вилояти вакиллиги
Матбуот хизмати