Ўзбекистон Республикаси Президенти Шавкат Мирзиёев 19 февраль куни мамлакатимизда ташриф билан бўлиб турган Саудия Арабистони Подшоҳлиги ҳаж ва умра ишлари вазири Тавфиқ бин Фавзон ар-Рабиа бошчилигидаги делегацияни қабул қилди.
Учрашув аввалида юқори мартабали меҳмон давлатимиз раҳбарига Саудия Арабистони Подшоҳи Салмон Ол Сауд ва Валиаҳд, мамлакат Бош вазири Муҳаммад Ол Сауднинг саломи ва самимий тилакларини етказди. Вазир, шунингдек, Подшоҳнинг кўп миллатли Ўзбекистон халқига ҳадяси – муқаддас Каъба ёпинчиғи кисванинг бир парчасини топширди.
Ўзбекистон етакчиси, ўз навбатида, Саудия Арабистони раҳбариятига бебаҳо туҳфа ҳамда зиёратчиларимизнинг мусулмон дунёси марказлари - Макка ва Мадинада бўлиши учун яратилган имкониятлар ва қулай шароитлар учун чуқур миннатдорлик билдирди. Биргина ўтган йилнинг ўзида 800 мингдан зиёд фуқароларимиз Умра зиёратини, 15 минг нафари Ҳаж ибодатини адо этди.
Суҳбат чоғида ўзбекистонлик зиёратчиларга шарт-шароитлар ва кўрсатилаётган хизматлар сифатини янада яхшилаш, уларнинг Саудия Арабистонига ташрифи хавфсиз ва қулай бўлишини таъминлаш масалаларига алоҳида эътибор қаратилди.
Бухоро шаҳридаги муҳташам Мир Араб олий мадрасаси биносида вилоятдаги диний соҳа ходимлари ва отинойилар учун «Илмий мақола ёзиш, тадқиқот методологияси ва манбашунослик» мавзусида амалий семинар ташкил этилди.
Баҳоуддин Нақшбанд илмий-тадқиқот маркази томонидан "TAMADDUN" лойиҳаси доирасида ўтказилган ушбу тадбир диний соҳа вакилларининг илмий салоҳиятини ошириш, тадқиқотчилик кўникмаларини шакллантириш ҳамда уларга илмий мақола ёзиш услубларини ўргатишга қаратилди.
Семинар давомида иштирокчиларга илмий тадқиқотларни тўғри ташкил этиш, қадимий манбалар билан ишлаш, республика ва халқаро журналларда мақолалар чоп этиш талаблари ҳамда нуфузли илмий анжуманларда иштирок этиш имкониятлари ҳақида атрофлича маълумотлар берилди.
Тадбирда марказ илмий ходимлари Гўзал Нажмидинова, Гавҳар Истамова ва Дилафруз Ғуломова ўз маърузалари билан иштирок этиб, тингловчиларга зарур методик тавсияларни баҳам кўрдилар. Қизғин баҳс-мунозараларга бой бўлган семинар якунида иштирокчилар ўзларини қизиқтирган саволларига жавоб олдилар ва мавзу юзасидан ўзаро фикр-мулоҳаза алмашдилар.
Ўзбекистон мусулмонлари идораси
Матбуот хизмати