20 Март, 2025, 20 Рамазон, 1446
20 Март, 2025, 20 Рамазон, 1446
Тошкент ислом институтининг 3-курс қорияси Робияхон Музаффархонова 30 пора Қуръони каримни бир кунда, 12 соат давомида ёддан ўқиб берди.
Қуръони каримни ўқиш жараёнини “Қуръон илмлари” кафедраси ўқитувчилари Жаҳонгир қори Неъматов, Аҳмадхон қори Рашидов, Валихон қори Азимбоев, Абдулбосит қори Қобилов, Робия Нажмиддинова ва бошқа устоз ҳамда талабалар кузатиб боришди.
Тошкент ислом институти ректори, тарих фанлари номзоди Уйғун домла Ғофуров мазкур натижани эътироф этиб, устозларга ғайрат ва шижоат тилади. Қуръони каримни 12 соатда ёддан ўқиб хатм қилган Робияхон Музаффархонова ноутбук ва эсдалик совғалари билан тақдирланди.
Таъкидлаш жоизки, “Қуръон илмлари” кафедраси устозларининг меҳнати натижасида Тошкент Ислом институтида Қуръони каримни бир кунда тўлиқ ёддан ўқиб бериш анъанага айланди. Бугунга қадар бундай ютуққа эришган қория талабалар сони 12 нафарга етди.
Шу вақтгача ушбу натижага Гулруҳ Кенжабек қизи, Робия Нажмиддинова, Фотима Абдуллаева, Ҳавасхон Акбарова, Назокат Сайдиллаева, Ҳуснора Мираҳмадова, Мухлиса Муҳамматханова, Хадича Қурбонова, Муҳсина Орифжонова, Амина Хўжаёр, Руқайя Юсуфий эришган.
Ўзбекистон мусулмонлари идораси
Матбуот хизмати
Шу йил 18 март куни Ўзбекистон мусулмонлари идораси раиси, муфтий, Шайх Нуриддин Холиқназар ҳазратлари Тошкент шаҳридаги "Иброҳим ота" масжидида ўқилаётган хатми Қуръонда иштирок этдилар.
Муфтий ҳазратлари жомега йиғилган мўмин-мусулмонларга Рамазон – ҳам жисман, ҳам руҳий покланиш ойи эканини баён этиш билан бирга динимизда рўзадорга ваъда қилинган мукофотлар ҳақида мавъиза қилдилар.
Манфаатли маъруза давомида Шайх ҳазратлари рўзадорга жуда кўп мукофотлар ваъда қилингани, хусусан, ҳадиси шарифларда рўзадорнинг гуноҳлари мағфират қилиниши, дўзахдан озод қилиниши, рўза ўз соҳибини жисмонан соғлом, руҳан бой инсонга айлантириши, Қиёмат куни шафоатчи бўлиши, “Райён” деб номланган дарвозадан чақирилиши ва рўзанинг мукофотини Аллоҳ таолонинг фақат Ўзи бериши ҳақида сўз юритдилар.
Гўзал суҳбат сўнгида барча рўзадорларга куч-қувват ва уларга ваъда қилинган улкан ажру савобларга эга бўлишларини тилаш баробарида юрт тинчлиги, халқимиз фаровонлигини сўраб, хайрли дуолар қилинди.
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 