Доктор Муҳаммад Ротиб Ноблусий айтадилар: Амстердамда яшовчи имом ўғли билан (11 йил мобайнида) таниган ва танимаган кишиларга ҳар жума "Жаннатга бошловчи йўлимиз" номли кичик бир рисолани тарқатиб чиқар экан. Бир сафар жума куни хаво совуб, ёмғир тинимсиз ёғди. Имом хаста бўлганлиги боис намозга бораолмади. 

Ўғил отасидан жумага ёлғиз боришга изн сўради. Жала қуйишига қарамай бола қўлидаги китобларни тарқатиб чиқди. Тарқатаётган китобнинг охиргиси қолди ва уни бериш учун тасодифан йўлиққан бир уйнинг эшигини тақиллатди. Аммо ҳеч ким чиқмади. Такрор-такрор тақиллатди, аммо яна жавоб бўлмади. Йўлида давом этар экан, негадир ўша уйнинг эшигини яна тақиллатиб, китобни бериб кеткиси келаверди. Энди бу сафар эшикни қаттиқроқ уриб, эгасини чақира бошлади. Эшик очилди, ундан ўта умидсиз ва махзун бўлган бир аёл чиқдида, "эшитаман болакай, нима ёрдам қилай" деди. Бола дунёни ёритар даражадаги нурли юзи билан табассум қилиб: "Узр Онажон, безовта қилдим, лекин сизга бир гап айтай Аллоҳ сизни яхши кўради, шунинг учун мени сизга юборди ва мен сизга ушбу китобни бергани келдим" деди. Умидсиз бўлиб турган аёл китобни унинг қўлидан олар экан "болажоним раҳмат сенга" дея кузатди. 

Кейинги жума куни намоздан сўнг бир аёл "мен Исломни қабул қилдим" дея овоз берди. У аёл сўзида давом этиб: эрим вафот этди ва мени ёлғиз холимда умидсиз қилиб ташлаб кетди. Ўзимни осмоқчи бўлиб, арқон ва курсини олиб келдим. Бўйнимга арқонни осиб, энди курсини тепиб юбормоқчи бўлган эдим, эшигимни кимдир тақиллатиб, чақириб қолди. Ўзимга-ўзим эшикни очмайман дедим. Лекин кимдир эшигимни тинимсиз тақиллатар ва ҳатто қаттиқ ура бошлади. Ким экан дедимда, бўйнимдан арқонни олиб, эшикни очдим. Қарасам кичик бир фаришта бола, менга табассум қилиб, ўлик қалбимни тирилтирадиган бир гапни айтди: "Онажон сизни Аллоҳ яхши кўради, шунинг учун мени сизга юборди" дедида, "Жаннатга бошловчи йўлимиз" деган рисолани қўлимга тутқазди. Қайтиб кириб, арқон ва курсини жойига қўйиб, китобни ўқий бошладим. Мен энг бахтли аёлга айландим, чунки мен Аллоҳни энди танидим. 

Ҳа азизлар! Бир-биримизни яхшиликка чорлаш барчамизнинг вазифамиздир. Қаранки кичик бир бола, бир аёлни дордан ва дўзахдан қутқариб қолди. 

Ўзимизга бир савол берайлик, биз нима қилдигу ёки нима қиляпмиз?!

Яҳё домла Убайдуллоҳ ўғли таржимаси
Олмазор тумани ''Имом ат-Термизий'' жоме масжиди имом хатиби