Мавлид ойидаги Мадина зиёрати ҳамюртларимизда унутилмас таассуротларга бой бўлмоқда!
Хабар берганимиздек, яхши ният ила юртимиздан умра сафарига отланган навбатдаги гуруҳ зиёратчилари эсон-омон Жидда шаҳрига етиб келди. Бу ерда уларни мутасаддилар кутиб олиб, замонавий автобусларларга ўтказиб, Мадинаи мунавварага кузатишди.
Зиёратчиларимиз Пайғамбаримиз алайҳиссалом шаҳарларига боргунга қадар Саудия Арабистонининг машҳур тансиқ таомларидан бири – Албайкни тановвул қилиб, чанқоқбосди салқин ичимликларни ичиш билан бирга тажрибали элликбошилардан маърузалар тинглаб, дуою зикрлар ила руҳий озуқа олдилар.
Мадинаи мунавварада ҳам юртдошларимиз муносиб кутиб олинди. Сўнгра меҳмонхона ошхонасида тушлик қилиб, ўзларининг шинам хоналарига жойлашдилар.
Иккинчи куни эрта тонгдан зиёратчиларимиз Масжидун Набавийда бомдод намозини адо этиб, Равзаи шариф зиёрати, муборак шаҳардаги Уҳуд тоғи, Қубо масжиди зиёратига бордилар, Хурмо боғларида сайр қилиб, янги хурмо меваларидан едилар.
Ислом тарихида катта ўринга эга бўлган бу маконларни ўз кўзлари билан кўрган, гуруҳбошиларидан улар ҳақидаги воқеаларни тинглаган зиёратчилар гўёки ўзларини Саодат асрига тушиб қолгандек ҳис қилиб, бир олам таассурот, илму ихлослари зиёда бўлган ҳолда меҳмонхонага қайтди.
Айни пайтда ҳамюртларимиз шавқу завқ ила ибодат ва зиёратларни давом эттирмоқда.
Ўзбекистон мусулмонлари идораси Матбуот хизмати
Ўзбекистон халқаро исломшунослик академияси ўқитувчилари Ал-Азҳарда малака оширди
Ўзбекистон халқаро исломшунослик академияси ўқитувчилари Мисрдаги Ал-Азҳар халқаро имом ва воизлар тайёрлаш академиясида малака оширди, деб хабар бермоқда “Дунё” АА.
Делегация аъзолари икки ҳафталик ўқув дастури давомида мисрлик исломшунос олимлар билан араб тилини ўрганиш, таълим тизимида инновацион технологиялардан кенг фойдаланиш, исломшунослик йўналишидаги янги ёндашувлар ва кўникмалар хусусида фикр-мулоҳазалар алмашди.
Малака ошириш курслари доирасида Ал-Азҳарда фаолият юритувчи таниқли имомлар томонидан маърузалар ташкил этилди. Хусусан, профессор Аҳмад ат-Таййиб турли мамлакатлардан келган уламолар, тадқиқотчилар ва профессор-ўқитувчиларнинг касбий салоҳиятини ошириш ҳамда халқаро илмий-академик ҳамкорликни мустаҳкамлаш борасида алоҳида тўхталиб ўтди.
Дастур давомида араб тилини ўқитишнинг замонавий стратегиялари, илғор педагогик ёндашувлар ва тил кўникмаларини амалиётга самарали татбиқ этиш масалаларига бағишланган маърузалар, амалий машғулотлар ҳамда семинарлар ҳам ўтказилди.
Ўқув дастури сўнггида Ал-Азҳар халқаро академияси президенти, профессор Ҳасан ас-Сағир ҳамда Ўзбекистоннинг Мисрдаги элчихонаси вакили тингловчиларнинг билим олишга бўлган иштиёқи ва фаоллигини юқори баҳолаб, ушбу курс халқаро миқёсда илмий ва даъват салоҳиятини оширишга хизмат қилишини таъкидлади.
Учрашувда курс давомида тайёрланган энг яхши амалий лойиҳалар муаллифлари алоҳида эътироф этилди. Шунингдек, Ўзбекистон халқаро исломшунослик академияси ўқитувчиларига сертификатлар тантанали равишда топширилди.
Ўзбекистон мусулмонлари идораси Матбуот хизмати
- «
- »