Ўзбекистон мусулмонлари идорасида "Соғлом турмуш тарзига риоя қилиш" мавзусидаги давра суҳбати ўтказилди. Унда Тошкент шаҳар Юқумли касалликларга қарши курашиш маркази мутахассиси Асомиддин Ибрагимов бугунги кундаги юқумли касалликларнинг хавфи, улардан ҳимояланиш усуллари ҳақида маъруза қилиб берди.

 Ислом дини таълимотларида ҳам инсон саломатлигига сабаб бўлувчи нарсаларга буюрилган. Ўз навбатида, саломатликка зарар етказувчи нарсалардан сақланиш тарғиб қилинган.

Абу Бакр Сиддиқ розияллоҳу анҳудан ривоят қилинади: “Расулуллоҳ соллаллоҳу алайҳи васалламнинг: «Аллоҳдан яқийнни ва мустаҳкам соғликни сўранглар. Зеро, одамларга яқийн ва мустаҳкам соғликдан кўра яхши нарса берилмаган», деганларини эшитдим” (Имом Термизий ривояти).

Яна бир ҳадиси шарифга кўра эса, аввал туяни боғлаб, яъни сабабни юзага чиқариб, сўнгра Аллоҳга таваккал қилишга чақирилганмиз. Шунга биноан саломатлигимиз борасида қайғуриб, унинг эҳтиётини қилиш мандуб амаллар сирасидан.

– Айни пайтда юртимизда 27 турдаги юқумли касаллик номи маълум бўлиб, уларнинг аксарига қарши даво чоралари бор, – деди шифокор А.Ибрагимов. – Ҳозирча буткул тузатиш имкони бўлмаган айрим касаллик турларининг вирусларини камайтириш ва музлатиб қўйиш амалиёти қўлланади. Давлатимиз томонидан кейинги пайтларда гепатит С ва бошқа шу турдаги касалликларга қарши бепул дори воситалари ҳам тарқатилмоқда. Лекин энг яхшиси, касалликни даволагандан кўра унинг олдини олишдир. Соғлом турмуш тарзига риоя қилиш шунинг учун ҳам жуда муҳим саналади. Зеро, Яратганнинг бизга берадиган ҳар қандай инъоми саломатлик неъмати билан бирга татийди.

Қизиқарли ўтган давра суҳбатида тингловчилар ўзларини қизиқтирган саволларга жавоблар олишди.

Ўзбекистон мусулмонлари идораси

Матбуот хизмати