Битирувчи ёшлар билан учрашув
27 сентябр куни Ўзбекистон мусулмонлари идорасининг Наманган вилоят вакиллигида Наманган вилояти бош имом-хатиби Мусохон домла Аббосиддинов раҳбарлигида Ўзбекистон мусулмонлари идораси тизимидаги олий ва ўрта махсус ислом таълим муассасаларининг 2024-2025 ўқув йили битирувчилари билан учрашув ўтказилди. Унда Наманган шаҳар ва туманлар бош имом-хатиблари, битирувчилар ишга юборилаётган масжидлар имом-хатиб ва мутаваллилари иштирок этдилар.
Учрашув аввалида битирувчиларни ишга тайинлаш тўғрисидаги Ўзбекистон мусулмонлари идораси буйруғи ўқиб эшиттирилди. Шундан сўнг ёшларга тараққиётимизнинг янги босқичида юртимизда ислом дини равнақи йўлида кенг имкониятлар очилгани, диний соҳа ходимларининг ижтимоий ҳаётда фаол иштирок этишлари учун кенг имкониятлар яратилгани айтиб ўтилди.
Шунингдек, уларга бугунги кун диний соҳа ходими замонга зийраклик билан қараши, ўзининг устида мунтазам ишлаши, касбий ва маънавий малакасини ошириши, жамоатчилик билан самарали ишлаш кўникмаларини ривожлантириш юзасидан тавсиялар берилиб, келгуси фаолиятларига Яратгандан зафарлар тиланди.
Ўзбекистон мусулмонлари идораси раҳбариятининг тавсиясига биноан янги ишга тайинланган имомлар вилоят бош имом-хатиби, вилоят бош имом-хатибининг ўринбосарлари ва туман-шаҳар бош имом-хатиблари томонидан масжид жамоасига таништирилиши режалаштитрилган. Бизни кузатишда давом этинг, имом домлаларни таништирув тадбирларини ёритиб борамиз.
Наманган вилояти вакиллиги
Матбуот хизмати
Ҳижрий янги йил: Муҳаррам ойини қандай ўтказиш керак?
Бисмиллаҳир Роҳманир Роҳийм
2026 йилнинг 16 июнь куни – янги 1448 ҳижрий йил – Муҳаррам ойи бошланишининг 1 кунидир. Ашуро куни 2026 йилнинг 25 июнь, пайшанба кунига тўғри келади.
Муҳаррам ойи қандай ой?
Муҳаррам ойи – мусулмонлар тақвимининг биринчи ойидир. Бу ой Аллоҳ таоло уруш, қон тўкишни ҳаром қилган (Зулҳижжа, Зулқаъда, Муҳаррам, Ражаб) тўрт ойнинг бири бўлиб, унинг ўнинчи куни яъни, ашуро куни алоҳида фазилатларга эга.
Ашуро қандай кун?
Бу кун ҳақида Расулуллоҳ соллаллоҳу алайҳи васаллам: “Бу шундай яхши кундирки, бу кунда Аллоҳ Бани Исроилни душманларидан қутқарган. Шу боис Мусо алайҳиссалом бу кунда рўза тутган. Мен Мусога кўпроқ (яқин бўлишга) ҳақлироқман”, дедилар ва у кунда рўза тутиб, одамларни ҳам унинг рўзасини тутишга буюрдилар” (Имом Бухорий ривояти).
Ашуро куни рўза тутиш ўтган бир йиллик гуноҳларга каффорат бўлади.
Бу ҳақда Расулуллоҳ соллаллоҳу алайҳи васаллам: “Ашуро кунининг рўзаси – Аллоҳдан умид қиламанки – бир йил олдинги гуноҳларга каффорат бўлади”, деганлар (Имом Муслим ривояти).
Бу кун яқинларга кенгчилик қилиш, бир йиллик кенгчиликка сабаб бўлади.
Абу Саъд розияллоҳу анҳудан ривоят қилинади. Набий соллаллоҳу алайҳи васаллам: “Ким Ашуро куни аҳли аёлига кенглик яратса, Аллоҳ унга йил бўйи кенглик яратади”, дедилар (Имом Байҳақий ривояти).
Ашуро кунини Расулуллоҳ соллаллоҳу алайҳи васаллам қандай ўтказардилар?
Расулуллоҳ соллаллоҳу алайҳи васаллам бу кунни ўтказиб юбормаслик учун қаттиқ ҳаракат қилардилар, унинг савобига эришиш учун бу куннинг келишини интиқлик билан кутардилар. Бу ҳақда Ибн Аббос розияллоҳу анҳу айтадилар: “Расулуллоҳ соллаллоҳу алайҳи васалламни Ашуро куни рўзасини Рамазон ойи рўзасини кутиб соғингандек, бошқа кун ва ой рўзасини кутганларини кўрмадим” (Имом Бухорий, Имом Муслим ривояти).
Абдуллоҳ ибн Аббос розияллоҳу анҳудан ривоят қилинади. Расулуллоҳ соллаллоҳу алайҳи васаллам Ашуро куни рўзасини тутиб, одамларни ҳам бу куннинг рўзасини тутишга буюрганларида, саҳобалар: “Ё, Расулуллоҳ! Бу кун яҳудий ва насронийлар улуғлайдиган кун-ку!” дейишди. Шунда Расулуллоҳ соллаллоҳу алайҳи васаллам: “Аллоҳ хоҳласа келаси йил тўққизинчи куни ҳам тутамиз”, дедилар. Аммо, келаси йил келмасидан Расулуллоҳ соллаллоҳу алайҳи васаллам вафот этдилар (Имом Муслим ривояти).
Уламоларимиз Расулуллоҳ соллаллоҳу алайҳи васалламнинг ушбу ниятларига эътиборан, Ашуро кунига қўшиб бир кун олдинги ёки бир кун кейинги кунда ҳам рўза тутмоқ афзал дейдилар.
Аллоҳ таоло ушбу ойнинг фазилатларидан барча мўмин-мусулмонларни тўлиқ баҳраманд этсин. Ўзининг розилигини топадиган амалларда бардавом қилсин.
Даврон НУРМУҲАММАД
- «
- »