1447/2026 йилги ҳаж мавсумида хизмат кўрсатишни мақсад қилган умумий овқатланиш муассасаларини Макка ҳокимияти рўйхатга олишни бошлади.
Рўйхатга олиш жараёни октябр ойининг охирларида бошланди — бу эса келгуси йилги ҳаж мавсумига тайёргарлик расман йўлга қўйилганини англатади.
Макка ҳокимияти зиёрат мавсуми давомида муқаддас шаҳар ҳудудидаги барча овқатланиш фаолиятини назорат қилади.
Барча муассасалардан соғлиқ ва сифат стандартларига қатъий риоя қилиш талаб этилади.
Рўйхатдан ўтган пудратчилар ва "кетринг" фирмалари ҳаж мавсуми бошлангунга қадар ўз ишларини режалаштириш, таъминот манбалари ва ходимларни ўқитиш учун етарли вақтга эга бўладилар.
Т.Азимов тайёрлади
БМТ Бош Ассамблеясининг қарорига кўра, 1997 йилдан буён 16 ноябрь бутун дунёда “Халқаро бағрикенглик куни” сифатида нишонланиб келинади. Бу сана Ўзбекистонда ҳам яхши анъанага айланган. Зеро, бағрикенглик халқимизга хос минг йиллик қадриятимизга айланган. У бошқа миллат ва дин вакилларига нисбатан ҳурмат, хайрихоҳлик ва мурувват билан муносабатда бўлиш, инсоннинг эътиқоди, тили ёки ирқига қарамасдан, энг аввало, уни инсоний қадр-қиммат билан эъзозлаш маданиятидир.
Бугун – 10 ноябрдан бошлаб “Ўзбекистон – бағрикенг диёр” шиори остида “Бағрикенглик ҳафталиги” тадбирлари бошланди. Ҳафталикнинг дастлабки тадбири мамлакатимиз Президенти ғояси асосида она Ватанимиз, мард ва жасур, тинчликсевар ва меҳнаткаш халқимиз шарафига бунёд этилган “Янги Ўзбекистон” боғидаги Мустақиллик монументи пойига гулчамбар қўйиш маросими бўлди.
Ўзбекистон Республикаси Дин ишлари бўйича қўмитаси раисининг биринчи ўринбосари Даврон Мақсудов, Ўзбекистон мусулмонлари идораси раисининг биринчи ўринбосари Ҳомиджон домла Ишматбеков, миллий маданий марказлар, дўстлик жамиятлари фаоллари, диний конфессия вакиллари, оммавий ахборот воситалари ходимлари ҳамда кенг жамоатчилик иштирок этган “Бағрикенглик марши”дан сўнг монумент пойига гуллар қўйилди.
Шундан кейин “Яшил макон” умуммиллий лойиҳаси доирасида турли миллат ва дин вакиллари иштирокида “Янги Ўзбекистон” боғида дарахт кўчатлари экиш маросими ўтказилди. Унда иштирокчилар яхши ният билан чинор кўчатларини экишди.
Таъкидлаш жоизки, жорий йилнинг 10–15 ноябрь кунлари мамлакатимиз бўйлаб ўтказилаётган “Бағрикенглик ҳафталиги” доирасида барча вилоятлар ва Тошкент шаҳридаги нуфузли санъат саройлари, театрлар, концерт заллари, томоша майдонлари, хиёбонлар ва боғларда турли маданий-маърифий ҳамда илмий-амалий байрамона тадбирлар ташкил этилади.
Ўзбекистон мусулмонлари идораси
Матбуот хизмати