Қизим сен катта бўлаётганингдан эмас, балки тезда улғайиб, бошқа бир хонадонга келин бўлиб кетишингдан, сени ҳар куни кўра олмасликдан ичимда бир хавотирми, соғинчми – нимадир бор. Ахир кечагина гўдак эдинг, бугун қизалоққа айландинг. Эртага...
 

Ҳар куни сўзларинг равонлашиб, фикрлашинг теран бўлмоқда. Қизим, сен улғайганинг сайин менинг кўнглим кичрайиб бормоқда. Сен билан кўпроқ вақтимни ўтказа олмаяпман...

Қизим, мен ўргатолмаганимни ҳаётдан ўрганасан. Шуни билгинки, ота қизига танбеҳ берса, бу унинг қизини ёмон кўришини англатмайди. Оталар қизларини жуда яхши кўришади. Жим турганида ҳам қизининг келажаги ҳақида ўйлаётган бўлади.

Ота шодланса, бунинг сабаби кўпроқ фарзандларининг ютуғи бўлади. Отанинг шаъни – борлиғи қизи билан боғлиқ бўлади.

Балоғатга етишинг, муносиб жуфтингни топиб, умматга, миллатга хизмат қиладиган фарзандларга она бўлишингни тилайман!

Билгинки, неча ёшга кирсанг ҳам мен сени худди ҳозиргидай яхши кўраман! Менга сени неъмат қилиб берган Зотга омонат бўл, қизим.

Акбаршоҳ Расулов