10 Феврал, 2026, 22 Шаъбон, 1447
10 Феврал, 2026, 22 Шаъбон, 1447
Фазилатли шайх Муҳаммад Аввома ҳафизаҳуллоҳ айтадилар:
"Ҳиндистонлик уламо Шайх Абдулҳай Лакнавий роҳимаҳуллоҳ ҳақида эшитгансизлар. Шайх Абдулҳай Лакнавий роҳимаҳуллоҳ ҳинд уламолари орасида ниҳоятда машҳур олим бўлган. У зот роҳимаҳуллоҳ қирқ ёшга етмасдан, яъни ўттиз тўққиз ярим ёшда вафот этган, қирққа кириб улгурмаган. Шунга қарамай, у жуда улкан илмий мерос қолдирган: унинг ёзган асарлари 115 дан ортиқ! Уларнинг ичида кичик рисолалар ҳам, катта китоблар ҳам бор. Аммо ўша кичик рисолаларнинг ўзи ҳам катта бир китобнинг ўрнини боса оладиган даражада эди, чунки уларнинг ҳар бирида маълум бир илмий масала ниҳоятда пухта ва мукаммал тарзда ёритиб берилган.
Бунинг сабаби қуйидагича: Бир куни ўша пайтдаги Лакнав амири шайхнинг илм билан машғул бўлиб, унга чуқур шўнғиб кетгани ва ақлбовар қилмас истеъдоди ҳақида хабар топади ва уни ўз ҳузурига чақиртиради. Шайх амирнинг олдига боргач, амир у зотга шундай дейди…
Унинг шайхга нима деганини айтишдан аввал ушбу воқеани ҳикоя қилиб берган ҳинд уламоси менга айтган яна бир гапни зикр қилиб ўтай: "Биз олти кишидан иборат оила эдик: ота-онам ва тўрт нафар фарзанд - жами олти киши. Ойига тўрт рупий бизга кифоя қилар эди". Мазкур уламо Шайх Абдулҳай Лакнавий вафотидан ўттиз йил ўтиб туғилган. Яъни, ўша даврда тўрт рупий ҳозиргидан анча катта харид қувватига эга бўлиб, авваллари бу пулга бугунги кундан кўра кўпроқ нарса сотиб олиш мумкин эди. Шунга қарамай, бу киши: "Бизнинг оиламизга ойига тўрт рупий етарди", деяпти...
Энди аввалги гапимизга қайтсак: Шундай қилиб Лакнав амири Шайх Абдулҳайни ҳузурига чақиртириб, у зотга: "Мен сизга ўз ҳисобимдан ойига тўрт юз рупий маош тайинлайман. Сиз илм билан машғул бўлиб, ўзингизни илмга бағишланг!" дейди.
Шайх бу воқеадан кейин илмга буткул берилди ва ана шундай буюк натижага эришди! Эй ёшлар, эътибор беринг, айтилган рақамларни мулоҳаза қилинг! Тўрт юз рупий шайх учун нақадар катта маблағ бўлган. Нега? Айни мана шу нарса учун - мен сизларга айтмоқчи бўлган нарса шу: Толиби илмни ўз кафиллигига олиш, яъни илм талаб қилувчини моддий жиҳатдан таъминлаш!
Бу унинг илмга бўлган таъсиридир. Тарих бизга буни реал воқелик мисолида кўрсатиб бермоқда. Шу боис ушбу ишни барча мусулмонлар орасида, жумладан, бой-зодагонлар ва уламолар ўртасида яна қайта тирилтиришимиз керакки, улар ўзаро ҳамкорлик асосида шаръий илмлар учун вақф қўллаб-қувватловини қайта тикласинлар".
Муҳаддис Муҳаммад Аввома суҳбатларидан
ҲИМ талабаси
Назирхонов Ҳасанхўжа таржимаси
#xabar #Idora_kubogi
Жорий йилнинг 9-10 февраль кунлари Ўзбекистон мусулмонлари идораси раиси, муфтий Шайх Нуриддин Холиқназар ҳазратлари ташаббуси билан диний соҳа ходимлари ўртасида спортнинг волейбол ва шахмат турлари бўйича “Ўзбекистон мусулмонлари идораси кубоги” мусобақаларининг республика босқичи ўтказилади.
Шу муносабат билан бугун, 8 февраль куни пойтахтимиздаги “Le Grande Plaza Hotel (Tata)” меҳмонхонасида мусобақаларнинг қуръа ташлаш маросими бўлиб ўтди. Унда Ўзбекистон мусулмонлари идораси раҳбарияти, Ўзбекистон Республикаси Спорт вазирлиги, Ўзбекистон волейбол ва шахмат федерациялари вакиллари, ҳакамлар, Қорақалпоғистон Республикаси, Тошкент шаҳри, вилоятлар бош имом-хатиблари, турнир иштирокчилари, оммавий ахборот воситалари ходимлари қатнашди.
Тадбирда Ўзбекистон мусулмонлари идораси раиси ўринбосарлари Зайниддин домла Эшонқулов, Обиджон Қодиров, Ўзбекистон волейбол федерацияси бош котиби Фарҳод Алимов ҳамда Ўзбекистон шахмат федерацияси масъул ходими Бахтиёр Жумаев сўзга чиқишди.
Нотиқлар мамлакатимизда кейинги йилларда жисмоний тарбия ва спортни оммалаштиришга алоҳида эътибор қаратилаётгани, бунинг соғлом турмуш тарзини қарор топтиришда аҳамияти катта эканини таъкидладилар. Шунингдек, диний соҳа ходимлари спортда ҳам фаол экани эътироф этилди.
Қуръа натижаларига кўра, жамоалар қуйидаги тартибда ўзаро беллашадиган бўлди:
1-ўйин: Ўзбекистон мусулмонлари идораси ва “Шамсуддинхон Бобохонов” нашриёти жамоаси.
2-ўйин: Самарқанд ва Тошкент вилоятлари жамоалари.
3-ўйин: Андижон ва Қашқадарё вилоятлари жамоалари.
4-ўйин: Фарғона вилояти ва Тошкент шаҳар жамоалари.
5-ўйин: Қорақалпоғистон Республикаси ва Сирдарё вилояти жамоалари.
6-ўйин: Хоразм ва Наманган вилоятлари жамоалари.
7-ўйин: Бухоро ва Жиззах вилоятлари жамоалари.
8-ўйин: Навоий ва Сурхондарё вилояти жамоалари.
Ақлни чархловчи спорт – шахмат бўйича ҳам баҳслар юқоридаги тартиб асосида бўлиб ўтади.
Маълумот ўрнида, беллашувлар Ўзбекистон волейбол ва шахмат федерациялари тартиб-қоидалари асосида ўтказилади. Волейбол бўйича ҳар бир жамоа таркиби 6 нафар асосий, 1 нафар захирадаги ўйинчи ҳамда 1 нафар мураббийдан ташкил топади. Шахматда эса жами 16 нафар иштирокчи ўзаро беллашади. Мусобақа ним чорак финал, чорак финал, ярим финал ва финал босқичларида ўтказилади.
Аллоҳ таоло мазкур мусобақаларни хайрли ва манфаатли қилсин!
Ўзбекистон мусулмонлари идораси
Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 