Бугун Қашқадарё вилоятида 2024–2025 ўқув йилида диний таълим муассасаларини муваффақиятли тамомлаган ёш соҳа ходимлари билан очиқ мулоқот учрашуви бўлиб ўтди. Учрашувда вилоят бош имом-хатиби Раҳматилло домла Усмонов соҳа ходимларининг ҳол-аҳволи ва хизмат фаолиятини ўрганиб, уларни қўллаб-қувватлаш, билим ва тажрибаларини ошириш масалаларига алоҳида эътибор қаратдилар.

Мулоқот чоғида ёш имомларга: 

• жамоат билан муомала маданияти, маънавий-маърифий тадбирларни замонавий талабларга мувофиқ ташкил этиш,

• диний билимларни мунтазам ошириш, китоб мутолааси ва ахборот маконида фаол бўлиш,

• турли ёт ғояларга маърифат билан жавоб бериш,

борасида муҳим тавсиялар берилди.

Вилоят бош имом-хатиби ёш имомлар соҳанинг келажакдаги таянчи эканини таъкидлаб, улардан доимий изланиш, ҳалоллик, сабр-тоқат ва фидойилик талаб этилишини қайд этдилар. Учрашув якунида соҳа ходимлари маслаҳатларни амалиётда қўллашга тайёрликларини билдирдилар.

Ўзбекистон мусулмонлари идораси
Қашқадарё вилояти вакиллиги
Матбуот хизмати