Муборак Қурбон ҳайити арафасида юртимизда инсон қадрини улуғлаш, аҳолининг ижтимоий ҳимояга муҳтож қатламларини қўллаб-қувватлаш ҳамда меҳр-оқибат муҳитини янада мустаҳкамлашга қаратилган эзгу ишлар кенг кўламда амалга оширилмоқда.

Давлатимиз раҳбарининг аҳоли саломатлигини таъминлашга қаратилган ташаббуслари доирасида “Вақф” хайрия жамоат фонди, Соғлиқни сақлаш вазирлиги ҳамда Ўзбекистон мусулмонлари идораси ҳамкорлигида бемор болаларни қўллаб-қувватлаш борасида амалий ишлар олиб борилмоқда. 

Ана шундай хайрли тадбирлардан бири Фарғона вилоятида ҳам ташкил этилди. Фарғона вилояти бош имом-хатиби Убайдуллоҳ домла Абдуллаев ҳамда вилоят соғлиқни сақлаш бошқармаси мутасаддилари Фарғона туманида бўлиб, икки босқичли мураккаб жарроҳлик амалиёти ўтказилиши лозим бўлган болажонлар ҳолидан хабар олдилар.

Самимий мулоқот давомида бемор болалар ва уларнинг ота-оналарига маънавий далда берилиб, шифо тиланди. Шунингдек, даволаниш жараёнларини қўллаб-қувватлаш мақсадида ажратилган хайрия маблағлари ўз эгаларига топширилди.

Бу каби тадбирлар жамиятимизда меҳр-шафқат ва инсонпарварлик туйғуларини мустаҳкамлашга, бемор фарзанд тарбиялаётган оилаларга халқимизга хос ғамхўрлик кўрсатишга хизмат қилмоқда. 

Ўзбекистон мусулмонлари идораси

Фарғона вилояти вакиллиги

Матбуот хизмати