Индонезиянинг Шарқий Ява провинцияси маъмурий маркази — Сурабая шаҳрида “Ўзбекистон туризм салоҳияти тақдимоти” мавзусида кенг қамровли тадбир ташкил этилди, деб хабар бермоқда “Дунё” АА мухбири.

Мамлакатимиз элчихонаси ташаббуси билан ўтказилган анжуманда маҳаллий ҳокимият вакиллари, 50 дан ортиқ етакчи туризм компаниялари раҳбарлари ва умра ташкилотчилари иштирок этди.

Тадбирнинг асосий мақсади — “Umrah Plus Uzbekistan” дастури доирасида қўшма турпакетларни тарғиб қилиш ва маҳаллий туроператорлар билан тўғридан-тўғри алоқаларни йўлга қўйишдан иборат бўлди.

Тақдимот давомида Ўзбекистон ва Индонезияни муштарак ислом цивилизацияси мероси ва маънавий қадриятлар боғлаб туриши алоҳида қайд этилди. Имом Бухорий, Имом Термизий ва Баҳоуддин Нақшбанд каби буюк алломаларнинг мероси индонезиялик зиёратчилар учун алоҳида аҳамият касб этиши таъкидланди. Самарқанд, Бухоро ва Хива шаҳарларининг бой тарихий-меъморий қиёфаси ҳамда замонавий туристик инфратузилмаси ҳақида батафсил маълумот берилди.

Тадбирда Шарқий Яванинг Гресик шаҳрида мақбараси жойлашган Мавлоно Малик Иброҳим Самарқандий (Сунан Гресик) шахсиятига алоҳида тўхталиб ўтилди. XIV асрда Ява оролида ислом динини ёйишда беқиёс хизмат қилган ушбу зот айнан Самарқанд заминидан етишиб чиққани икки мамлакат ўртасидаги маънавий кўприк сифатида эътироф этилди. Бу ҳолат индонезияликлар қалбида Ўзбекистонга нисбатан алоҳида меҳр ва ҳурмат уйғотиши қайд этилди.

Музокаралар доирасида йилига 12 мингдан зиёд сайёҳга хизмат кўрсатувчи “An Namiroh Travel”, “Ebad Travel” ва “Safira Travel” каби йирик компаниялар раҳбарлари билан учрашувлар ўтказилди. Ушбу туроператорлар Ўзбекистон бўйлаб зиёрат ва маданий туризм пакетларини ўз фаолият йўналишларига қўшишга ҳамда амалий ҳамкорликни йўлга қўйишга тайёр эканликларини маълум қилдилар.

AMPHURI (Умра ва Ҳаж ташкилотчилари ассоциацияси) минтақавий бўлинмаси раиси Муҳаммад Суфян Ариф Ўзбекистонни «Имом Бухорий юрти» деб атаб, Самарқанд ва Бухорони зиёрат қилиш ҳар бир индонезиялик мусулмон оиласининг катта орзуси эканини таъкидлади. Унинг фикрича, “Umrah Plus” дастурларини мазмунан бойитишда Ўзбекистон йўналиши энг истиқболли ва долзарб йўналишлардан бири ҳисобланади.

Тадбир Индонезия оммавий ахборот воситаларида кенг ёритилди. Электрон нашрлардаги мақолаларда Ўзбекистон Буюк Ипак йўли меросини замонавий туризм дипломатияси билан уйғунлаштирган ҳолда, жаҳон ислом туризми маконида муҳим марказ сифатида шаклланаётгани юқори баҳоланди. Бу каби тарғибот ишлари мамлакатимизнинг халқаро майдондаги ижобий имижини янада мустаҳкамлашга хизмат қилади. 

dunyo.info