Ўзбекистон мусулмонлари идораси

Шу йилнинг 8 апрель куни "Имом Термизий" ўрта махсус ислом таълим муассасасида битирувчи курс талабаларининг келгуси фаолияти ва ишга тақсимотига бағишланган тадбир ташкил этилди. Унда Ўзбекистон мусулмонлари идорасининг масъул ходимлари Абдуносир Бобомирзаев, Муҳаммадяҳё Ходжаев ҳамда Дилмурод Раҳимов иштирок этди.

Таълим муассасаси директори К.Исламов ҳамроҳлигида меҳмонлар дастлаб ўқув жараёнлари, дарс сифати ва талабалар билимини оширишга қаратилган методик ёндашувлар билан яқиндан танишдилар. Шундан сўнг битирувчи курс талабалари билан юзма-юз мулоқот ўтказилди. Учрашув давомида бўлажак мутахассисларга уларнинг ишга тақсимоти, фаолият бошлайдиган масжид ва муассасалардаги вазифалари ҳамда касбий масъулияти юзасидан атрофлича маълумот берилди.

Ташриф якунида мутахассислар томонидан таълим сифатини янада ошириш, тарбиявий ишларни кучайтириш ҳамда талабалар учун шароитларни такомиллаштириш бўйича муҳим тавсиялар билдирилди. Маълумот ўрнида айтиш жоизки, 2025-2026 ўқув йилида мазкур таълим муассасасини 24 нафар талаба тамомлаб, диний-маърифий соҳада ўз хизмат фаолиятини бошлаш арафасида турибди.

“Имом Термизий” ЎМИТМ

Матбуот хизмати

Янгиликлар

Шайхулислом Оллоҳшукур Пошшозода Мир Араб мадрасасида бўлди

13.07.2026 6024 1 min.

#xabar #Islom_sivilizatsiyasi_forumi #buxoro

Шу йил 11 июль куни Кавказ мусулмонлари идораси раиси, Шайхулислом Оллоҳшукур Пошшозода Мир Араб ўрта махсус ислом таълим муассасасига ташриф буюрди.

Ташриф давомида меҳмон ўзлари таҳсил олган қутлуғ илм даргоҳида яратилган замонавий шароитлар, таълим жараёни ҳамда кейинги йилларда амалга оширилган бунёдкорлик ишлари билан яқиндан танишди. Шунингдек, устозлар билан самимий мулоқот қилиб, талаба йилларига оид илиқ хотиралари билан ўртоқлашди.

Шайхулислом Оллоҳшукур Пошшозода 1968–1973 йилларда Мир Араб мадрасасида таҳсил олган бўлиб, кейинчалик Тошкент Ислом институтини тамомлаган. 1979 йилдан буён Кавказ мусулмонлари идораси раиси сифатида фаолият юритиб келмоқда. Шунингдек, у халқаро диний ташкилотлар ва маслаҳат кенгашларининг фаол аъзоларидан бири ҳисобланади.

Ташриф чоғида Шайхулислом Ўзбекистонда диний-маърифий соҳада амалга оширилаётган кенг кўламли ислоҳотлар, тарихий обидалар ва муқаддас қадамжоларни асраб-авайлаш, таълим муассасаларини ривожлантириш йўлидаги саъй-ҳаракатларни юксак баҳолади.

У киши бу юртда устозларидан нафақат диний илм, балки ҳаёт сабоқларини ҳам олганини алоҳида таъкидлаб, Мир Араб мадрасаси ва бошқа муқаддас масканларда амалга оширилган ободонлаштириш ишлари давлатнинг дин ва миллий меросга бўлган юксак эътиборининг амалий ифодаси эканини қайд этди.

Ташриф якунида Мир Араб мадрасаси жамоаси меҳмонга самимий ташаккур изҳор қилиб, мазкур учрашув устозлар ва талабалар учун унутилмас маънавий-маърифий мулоқот бўлганини таъкидлади.

Ўзбекистон мусулмонлари идораси

Матбуот хизмати