27 Май, 2026, 9 Зулҳижжа, 1447
27 Май, 2026, 9 Зулҳижжа, 1447
Мамлакатимизда ёшларни ўз соҳада етук мутахассис этиб етиштириш, уларни масъулиятли ва ўз хизматига фидоий қилиб тарбиялаш борасида “Саййид Муҳйиддин махдум” ўрта махсус ислом таълим муассасасида муҳим тадбирлар ташкил этилмоқда.
Жорий йилнинг 9 апрель куни Ўзбекистон мусулмонлари идораси раиси ўринбосари Муҳаммадолим Муҳаммадсиддиқов, Масжидлар бўлими бошлиғи Музаффар Камолов ва Кадрлар бўлими бошлиғи Салоҳиддин Шерхонов таълим муассасасида бўлишди.
Дастлаб талабалар учун яратилган замонавий шарт-шароитлар билан яқиндан танишилди. Сўнг битирувчи курс талабалари билан очиқ мулоқот ўтказилди.
Учрашув давомида 42 нафар битирувчи талабанинг келгуси фаолияти ҳақида сўз борди. Мулоқот давомида битирувчи талабалар ўз олдиларига аниқ мақсадларни қўйганлари намоён бўлди. Хусусан, ёшларнинг араб, инглиз ва немис тилларини пухта эгаллагани уларнинг нафақат юртимиз, балки Ўзбекистон мусулмонлари идораси тавсияси асосида халқаро миқёсда ҳам диний хизмат олиб бориш имкониятини кенгайтириши алоҳида қайд этилди.
Шунингдек, учрашувда таълимни юқори босқичларда давом эттириш истагида бўлган ёшлар учун яратилган кенг имкониятлар ҳақида маълумот берилди.
Маълумот учун, муассасанинг ўтган йилги битирувчиларидан 4 нафари Иорданиядаги Ислом илмлари университетида таҳсилни давом эттирмоқда. Бу каби ижобий натижалар муассаса раҳбарияти ва мударрисларнинг фидокорона меҳнати ҳамда тажрибали устозларнинг мунтазам тарғибот ишлари самараси ҳисобланади.
Самимий руҳда ўтган йиғилиш якунида ёшларни тўғри йўналтириш ва уларга устозлар тажрибасини етказиш орқали динимиз ва юртимиз равнақи йўлида хизмат қиладиган салоҳиятли кадрлар бўлишига ишонч билдирилди.
Ўзбекистон мусулмонлари идораси
Матбуот хизмати
Бисмиллаҳир Роҳманир Роҳийм
- Расулуллоҳ соллаллоҳу алайҳи васаллам Қурбон ҳайити куни ғусл олардилар.
Ибн Аббос розияллоҳу анҳумодан ривоят қилинади: “Расулуллоҳ соллаллоҳу алайҳи васаллам Рамазон ҳайити куни ва Қурбон ҳайити куни ғусл қилар эдилар” (Ибн Можа ривояти).
- Расулуллоҳ соллаллоҳу алайҳи васаллам Қурбон ҳайитида қурбонлик қилишдан олдин ҳеч нарса емасдилар.
Бурайда розияллоҳу анҳу айтадилар: “Набий соллаллоҳу алайҳи васаллам Фитр куни таомлангунларича (фитр намозига) чиқмас эдилар ва Қурбонлик куни намоз ўқигунларича таомланмас эдилар” (Имом Термизий ривояти).
- Расулуллоҳ соллаллоҳу алайҳи васаллам масжидга пиёда юриб борардилар.
Абу Рофеъ розияллоҳу анҳудан ривоят қилинади: “Расулуллоҳ соллаллоҳу алайҳи васаллам икки ҳайит намозига пиёда чиқар эдилар” (Ибн Можа ривоят қилган).
- Масжидга кетишда Аллоҳни зикр қилардилар.
Ибн Умар розияллоҳу анҳумодан ривоят қилинади: “Набий соллаллоҳу алайҳи васаллам то намозгоҳга боргунларича такбир айтар эдилар” (Имом Ҳоким ривояти).
- Ҳайит намозидан олдин нафл намоз ўқимас эдилар.
Абу Саъид Худрий розияллоҳу анҳу айтадилар: “Расулуллоҳ соллаллоҳу алайҳи васаллам ҳайит намозидан олдин ҳеч нарса ўқимас эдилар, манзилларига қайтганларида икки ракат намоз ўқир эдилар” (Ибн Можа ривоят қилган).
- Масжидга бир йўлдан бориб, бошқа йўлдан қайтар эдилар.
Жобир розияллоҳу анҳудан ривоят қилинади: “Набий соллаллоҳу алайҳи васаллам ҳайит куни (бориш ва қайтиш) йўлларини бошқа-бошқа қилар эдилар” (Имом Бухорий ривояти).
- Ҳайит намозидан сўнг қурбонлик қилардилар.
Баро ибн Озиб розияллоҳу анҳудан ривоят қилинади. Расулуллоҳ соллаллоҳу алайҳи васаллам: “Ким намоздан олдин курбонлик қилса, у ўзига қўй сўйибди. Ким намоздан кейин сўйса, курбонлигини мукаммал қилибди ва мусулмонларнинг суннатини топибди”, дедилар (Имом Бухорий, Имом Муслим ривояти).
Аллоҳ таоло барчамизни ҳар бир ишда Набий соллаллоҳу алайҳи васалламга эгашувчилардан қилсин!
Даврон НУРМУҲАММАД
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 