Энг олий мақомли аёл
Сени қўрқитган қанчадан-қанча ишлар,
Орзуларинг сен томон судраб келтирар.
Эй, чин муслима ва тақволи мўмина синглим! Сиз ёмонликдан узоқ, азиятлардан юқорида турадиган, унга тош отилса уларга хурмо бериб яхшилик қиладиган, доимо яшил бўлиб турадиган ва манфаатлари кўп араб хурмоси каби бўлинг. Сиз аҳмоқона майда ишлар ва ҳаёйингизни тортиб олишга олиб борадиган амаллардан баландда турадиган мақоми олий аёл бўлинг. Каломингиз зикр, назарингиз ибрат ва сукутингиз тафаккур бўлсин. Шундагина сиз саодат ва роҳатга етишасиз. Атрофда яхшилик билан ном қозонасиз, сизга чин дилдан дуо қилишади ва яхши сўзлар билан ёдга олишади.
Аллоҳ таоло сиздан танглик, қўрқув шарпалари ва ғам тўдаларини кетказади. Шунда сиз мўминларнинг сизга қилган дуолари остида ухлаб, сизга айтилган мақтовлар остида уйғонасиз. Бахт бойлик заҳиралари, либослар ва ходимларнинг кўплигида эмас, ҳақиқий бахт Аллоҳга итоат этишда эканини тўлиқ англаб етасиз.
Шуъла: Ўзингизга ишонинг! Чунки ўзгариш жуда секин бўлади. Бу йўлда иштиёқингизни сўндирадиган қийинчиликларга учрайсиз. Зинҳор уларга бўш келманг, агар бўш келсангиз улар албатта сизни мағлуб қилишади.
Доктор Оиз ал-Қарнийнинг
"Дунёдаги энг бахтли аёл" китобидан
"Ислом гиёҳвандликка қарши" мавзусида семинар ўтказилди
#Семинар
#Гиёҳвандликка_қаршимиз
Ислом динида ақлни хиралаштирадиган, соғлиққа зарар етказадиган ва инсонни ўз-ўзини ҳалокатга бошлайдиган ҳар қандай зарарли одатлар, хусусан, гиёҳвандлик қатъий қораланган ва ҳаром қилинган.
Пайғамбаримиз Муҳаммад соллаллоҳу алайҳи ва саллам ҳар қандай маст қилувчи ва баданни бўшаштирувчи, соғлиққа зарар берувчи моддаларни истеъмол қилишдан қайтарганлар.
Бинобарин, гиёҳвандликка қарши курашиш, ёшларни бу офатдан асраш ва соғлом турмуш тарзини тарғиб қилиш ҳар бир мусулмоннинг бурчидир.
2026 йил 2 июль куни Тошкент шаҳридаги муҳташам "Шайх Муҳаммад Содиқ Муҳаммад Юсуф" жоме масжидининг мажлислар залида ўзгача бир файз ва илму маърифат шукуҳи ҳукмрон бўлди.
Ўзбекистон мусулмонлари идораси Тошкент шаҳар вакиллигининг "Ислом гиёҳвандликка қарши" деб номланган илмий-амалий семинари юқори кайфиятда ва кўтаринки руҳда ўтказилди.
Учрашувда диний-маърифий соҳанинг забардаст вакиллари, давлат ва жамоат ташкилотлари мутасаддилари ҳамда пойтахтимизнинг туман бош имом-хатиблари ва отинойилари жам бўлишди.
Қуръон тиловатидан сўнг Тошкент шаҳар бош имом-хатиби, йиғилиш раиси Абдуқаҳҳор домла Юнусов тадбирни очиб бердилар.
Сўнгра Дин ишлари бўйича қўмита бўлим бошлиғи Муҳиддин Ҳакимов, Тошкент шаҳар ҳокимининг жамоат ва диний ташкилотлар билан алоқалар бўйича ўринбосари, котибият мудири Абдуманнон Каримов, Кўкалдош ўрта махсус ислом билим юрти раҳбари Маъмуржон домла Эркаевлар иштирок этиб, кун тартибидаги муҳим масалалар юзасидан ўз фикр-мулоҳазалари ва қимматли тавсияларини айтиб ўтдилар.
Айтиш жоизки, маърифат ва иймон бирлашган жойда барака, тинчлик ва тараққиёт бўлади. Пойтахтимиз имом-хатиблари бугун халқимизга мана шу зиёни етказишда энг олдинги сафларда хизмат қилмоқдалар.
Суратлар орқали мазкур йиғилишнинг энг ҳаяжонли ва файзли дақиқалари ҳамда семинарнинг долзарб аҳамиятини кўриш мумкин.
MuslimShosh.uz
