Бугун, 30 апрель куни Ўзбекистон ислом цивилизацияси марказида Диний идора раиси ўринбосари, профессор Муҳаммадолим домла Муҳаммадсиддиқов Татаристон мусулмонлари диний идораси раисининг ўринбосари, академик Рафиқ Мухаметшович бошчилигидаги делегацияни қабул қилди.
Самимий руҳда ўтган мулоқотда юртимизда диний-маърифий соҳада амалга оширилаётган ислоҳотлар, хусусан, янги очилган олий ва ўрта махсус таълим муассасалари ҳамда Қуръон курслари фаолияти алоҳида эътироф этилди.
Ўз навбатида, академик Рафиқ Мухаметшович Қозон ислом университети диний таълим йўналишида ўзаро ҳамкорлик ўрнатиш, хусусан, ўқув дастурлари ва адабиётларини алмашиш юзасидан муҳим таклифларини илгари сурди.
Учрашув давомида томонлар ўзаро алоқаларни тизимли ва босқичма-босқич ривожлантиришга келишиб олдилар.
Дўстона учрашув якунида ўзаро ҳадялар алмашилди.
Ўзбекистон мусулмонлари идораси
Матбуот хизмати
Бир гуруҳ наманганлик фаол нуронийлар қўшни Қозоғистон Республикасининг Туркистон шаҳрига зиёрат ва саёҳат сафарини уюштирди. Эзгу мақсадда йўлга чиққан отахонлар сафар давомида ҳудуддаги тарихий обидалар, муқаддас қадамжолар ва замонавий бунёдкорлик намуналари билан яқиндан танишди.
Зиёрат дастури Туркистон шаҳрида Ўзбекистон Республикаси Президенти Шавкат Мирзиёев ташаббуси билан барпо этилган муҳташам масжид мажмуасидан бошланди. Ўзининг бетакрор меъморий ечими, нафис безаклари ҳамда миллий ва исломий қадриятларни ўзида мужассам этган кўриниши билан ажралиб турувчи ушбу зиёратгоҳ нуронийларда катта таассурот қолдирди. Зиёратчилар мажмуада яратилган шароитларни алоҳида эътироф этиб, қардош халқлар ўртасидаги дўстлик ришталари янада мустаҳкамланиб бораётганини мамнуният билан қайд этди.
Сафарнинг кейинги манзили бутун ислом оламида юксак эҳтиромга сазовор бўлган буюк мутафаккир Хўжа Аҳмад Яссавий мақбараси бўлди. Нуронийлар ушбу табаррук қадамжода Қуръон тиловат қилиб, юртимиз тинчлиги, халқимиз фаровонлиги ва юрт осойишталигини сўраб хайрли дуолар қилдилар. Зиёрат доирасида нуронийлар томонидан жонлиқ сўйилиб, эҳсон дастурхони ҳам ёзилди.
Қардош ўлкага уюштирилган ушбу маънавий сафар тарих, маданият ва диний қадриятлар муштараклигини яна бир бор ҳис эттирган ҳолда, зиёратчиларда унутилмас хотиралар қолдирди.
Ўзбекистон мусулмонлари идораси
Матбуот хизмати