05 Июн, 2026, 18 Зулҳижжа, 1447
05 Июн, 2026, 18 Зулҳижжа, 1447
Муқаддас Қурбон ҳайитини нишонлашга бағишланган тадбирлар доирасида Ўзбекистон мусулмонлари идораси делегацияси Жанубий Кореяга ташриф буюрди, деб хабар бермоқда “Дунё” АА мухбири.
Сафар давомида Тошкент шаҳри Олмазор туманидаги “Мирзо Ғолиб” жоме масжиди имом-хатиби Исахон Бегматов, Самарқанд вилояти Ургут тумани бош имом-хатиби, “Мулла Шоди бобо” жоме масжиди имом-хатиби Абдуғани Ҳасанов ҳамда Тошкент шаҳридаги “Жобир ибн Абдуллоҳ” жоме масжиди имом-хатиби Мирза Алихоновдан иборат делегация Корея мусулмонлари федерацияси раиси Ҳусайн Ким Дон Ёк билан учрашди.
Музокаралар чоғида томонлар Жанубий Кореядаги мусулмон жамоасининг бугунги ҳолати, динлараро мулоқотни ривожлантириш масалалари ҳамда маданий-гуманитар соҳадаги ҳамкорликнинг истиқболли йўналишларини муҳокама қилди.
Диний-маърифий ишлар, динлараро ўзаро англашувни мустаҳкамлаш, маданий ўзига хосликни сақлаш ва гуманитар алоқаларни кенгайтириш масалаларига алоҳида эътибор қаратилди. Томонлар ўзаро ҳамкорликни янада ривожлантириш ва мунтазам алоқаларни давом эттиришдан манфаатдор эканини таъкидлади.
Ташриф доирасида Жанубий Кореяда истиқомат қилаётган ватандошлар учун маърифий суҳбат уюштирилди. Тадбир давомида маънавий-ахлоқий тарбия, ўзбек диаспораси ҳамжиҳатлигини мустаҳкамлаш, анъанавий оилавий қадриятлар ҳамда ўзаро ҳурмат маданиятини асраб-авайлаш масалалари муҳокама қилинди.
Шунингдек, делегация жамоавий намоз ўқиди, иштирокчиларга тинчлик-фаровонлик, иймонни мустаҳкамлаш, хорижда яшаш шароитида миллий ва диний анъаналарни сақлашга оид панд-насиҳатлар бериб, эзгу тилаклар билдирди.
Ташкил этилган “Эҳсон” хайрия тадбирида Ўзбекистон мусулмонлари идораси вакиллари ҳамда ушбу мамлакатда вақтинча меҳнат фаолиятини юритаётган ватандошлар иштирок этди.
Акциянинг асосий мақсади хориждаги Ўзбекистон фуқароларига моддий ва маънавий кўмак бериш, ўзаро ёрдам ва бирдамлик анъаналарини мустаҳкамлашдан иборат бўлди. Хайрия дастурхонига 100 нафардан ортиқ юртдош таклиф этилди, 50 та эҳтиёжманд оилага байрам совғалари улашилди.
Исахон Бегматов Қурбон ҳайитининг маънавий аҳамияти, хайрия, бирдамлик ва ўзаро кўмакнинг, шунингдек, Ватандан йироқда миллий ва диний анъаналарни асрашнинг муҳимлиги ҳақида сўз юритди.
Шу каби маърифий тадбирлар Ўзбекистон фуқаролари кўплаб истиқомат қиладиган Кёнсан, Кимхе, Чунчон, Кванжу, Мокпо, Кунсан ва Тежон шаҳарларида ҳам ўтказилди.
Ўзбекистон мусулмонлари идораси
Матбуот хизмати
Бисмиллаҳир Роҳманир Роҳийм
Ҳозиргина масжидда ҳожиларимиз учун Ватанга қайтиш олдидан навбатдаги маърузамни қилиб, хонамга қайтиб келдим.
Шу дамда ҳамхонам, физика-математика фанлари номзоди (PhD), устоз Хайрулла Раҳматуллаевич ШАМАТОВ шундай бир мулоҳазани айтиб қолдиларки, уни эшитиб ўрнимдан туриб кетдим.
Дарҳақиқат, баъзан бир рақам минглаб сўзлар ёритиб бера олмайдиган ҳақиқатларни очиб беради.
Бу йил муҳтарам Юртбошимизнинг ташаббуслари билан Ўзбекистондан ҳаж сафарига келиш бахти 15 минг нафардан ортиқ ватандошларимиз учун насиб этди.
Энди бир лаҳза тасаввур қилинг, бугун юртимиз аҳолиси қарийб 40 миллион нафар. Агар фаразан ҳар йил улардан 15 миллион нафари ҳаж қилиш имкониятига эга, деб ҳисобласак ва ҳар йили 15 минг нафар зиёратчи ҳаж ибодатини адо этиш учун келиб турса, мазкур 15 миллион инсонларнинг барчасига ҳаж сафари насиб этиши учун тахминан бир минг йил вақт керак бўлар экан.
Ўн аср... Бир минг йил...
Бугундан орқага назар ташласангиз, бу муддат бизни Имом Бухорий роҳматуллоҳи алайҳи яшаган даврларга олиб боради.
Демак, айнан Сизга шу йил, шу фасл, шу кунларда Аллоҳ таолонинг меҳмони бўлиш насиб этгани оддий воқеа эмас!
Бу миллионлар ичидан қилинган танловдир!
Бу қайсидир маънода — мўъжиза!
Бугун Сиз ҳаж ибодатини адо этдингиз!
Бугун Сиз Расулуллоҳ соллаллоҳу алайҳи васалламнинг ҳужраи саодатлари олдида туриб, салом ва саловатлар айтдингиз!
Бугун Сиз Каъбани кўриб турибсиз!
Бугун Сиз Масжиди Ҳаромда намоз ўқияпсиз!
Бугун Сиз Расулуллоҳ соллаллоҳу алайҳи васаллам юрган, Қуръон оятлари нозил бўлган икки муборак замин узра қадам босиб турибсиз!
Бугун Сиз икки Ҳарами шариф азонларини ўз қулоғингиз билан эшитмоқдасиз!
Ҳолбуки, шу орзу билан яшаб, унга ета олмай дунёдан ўтган қанчадан-қанча инсонлар бор...
Шу боис ҳам ҳаж сафари инсон ҳаётидаги оддий сафар эмас.
У — умр сафаридир!
У — қалбни ўзгартириш учун берилган имкониятдир!
У — тавба учун очилган улкан эшикдир!
У — қордек оппоқ ва покиза саҳифалар сари етакловчи илоҳий чақириққа жавобан айтилган лаббайкалардир!
Шу боис ҳам Расулуллоҳ соллаллоҳу алайҳи васаллам мабрур ҳажнинг мукофоти жаннатдан бошқа нарса эмаслигини башорат қилганлар!
Инсон мукофоти жаннат бўлган амални адо эта туриб ҳам номақбул хулқини тарк этмаса, тилини ёмон сўзлардан сақламаса, одамларни ранжитишдан қайтмаса, вақтларини беҳудага бозор кезиш ва фойдасиз машғулотларга сарфлаб юраверса, у бу улуғ неъматнинг қадрини қай даражада англаган бўлиши мумкин?!
Ҳаж — Маккага келиш эмас, Аллоҳга қайтишдир!
Ҳаж — Каъбани кўриш эмас, қалбни уйғотишдир!
Ҳаж — сафарнинг тугаши эмас, янги ҳаётнинг бошланишидир!
Ҳаж — тугалланган ибодат эмас, бошланган масъулиятдир!
Ҳаж — гуноҳлардан покланиб, янги инсон бўлиб яшаш аҳдидир!
Шундай экан, бу муборак кунларнинг ҳар бир нафасини ғанимат билиб, Аллоҳ таоло миллионлаб инсонлар орасидан бизга насиб этган бу беқиёс имкониятнинг қадрига етайлик!
Зеро, баъзи инсонлар бу муборак заминга келиб, ҳаж амалини адо этиш учун ЙИЛЛАР эмас, балки АСРЛАР НАВБАТИДА ТУРИБДИ...
Аллоҳ таоло ҳажимизни мабрур, саъй-ҳаракатларимизни машкур, гуноҳларимизни мағфур, дуоларимизни мақбул айласин. Амин.
Нурали домла МАВЛАНОВ,
“Ҳаж-2026” мавсуми Тошкент вилояти 12-гуруҳ зиёратчилари раҳбари, Тошкент тумани “Кўк Терак” жоме масжиди имом-хатиби,
Ўзбекистон халқаро исломшунослик академияси таянч докторанти.
2 июнь, 2026 йил.
16 зул-ҳижжа, 1447 йил.
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 