11 Август, 2026, 28 Сафар, 1448
11 Август, 2026, 28 Сафар, 1448
Агар муҳаббатинг бўлса аниқ ҳақиқат,
Бўлар бошқаси беҳудаликдан иборат.
Аллоҳ таоло сахийларнинг энг сахийси, карамлиларнинг энг карамлисидир. Бандасига сўрамаган нарсаларини ҳам беради, озгина ибодат эвазига ҳам уни мақтаб, савобларини кўпайтириб беради. Хато ва камчиликларини эса кечириб ўчириб юборади. Осмонлару ердагиларнинг барчаси У зотдан сўрайди, лекин бирини эшитиш бошқасини эшитишдан машғул қилиб қўймайди, сўровларнинг кўплиги Уни чалкаштирмайди, қаттиқ туриб олиб сўраганларнинг бу ишлари Уни ранжитмайди, балки ана шундай кўп сўровчиларни яхши кўради. Сўралса яхши кўради, сўралмаса ғазаб қилади.
Бандаси сўраганда бермасликка ҳаё қилади, лекин банда ҳаё қилмай гуноҳ қилаверади. Банда ўзининг гуноҳларини тўсмаса ҳам Аллоҳ уларни беркитади, банда ўзига зулм қилсада Аллоҳ унга раҳм қилади. Қалблар фақат Угина яхшиликлар берадиган ва гуноҳларни кечирадиган зотни қандай севмасин? Ахир, У зот дуоларни ижобат қилади, хатоларни кечиради, айбларни беркитади, қийинчилик ва ғам-ташвишларни аритади.
Аллоҳ... У зот энг раҳимли, кўплаб неъматларни берадиган ва паноҳ сўраладиганларнинг энг буюгидир. У банданинг таваккул қилишига кифоя ва бандаларига ота-онасиданда меҳрибон зот. Бандасининг тавбасидан чўлу биёбонда бор озиқ-овқати билан туясини йўқотиб қўйиб, ўлимига оз қолган ва ҳаётдан умидини узган вақтда туясини топиб олган кишининг хурсандчилигидан кўра хурсанд бўлади.
Шуъла: Қарорингиз доимо тажриба орттириб саодатга эришиш бўлсин.
Доктор Оиз ал-Қарнийнинг
"Дунёдаги энг бахтли аёл" китобидан
Ироқнинг “Azzaman” газетасида “Ўзбекистон мустақиллигининг ўттиз беш йиллиги: Давлат барпо этишдан Учинчи Ренессанс сари” номли мақола эълон қилинди, деб хабар бермоқда “Дунё” АА.
Мақолада таъкидланишича, Ўзбекистоннинг мустақиллик йилларида босиб ўтган тараққиёт йўли, амалга оширилган кенг кўламли ислоҳотлар ҳамда мамлакатнинг халқаро майдондаги нуфузи тобора юксалиб бормоқда.
1991 йилда қўлга киритилган мустақиллик Ўзбекистон халқи ҳаётида тарихий бурилиш ясаб, миллий давлатчилик асосларини шакллантириш, иқтисодий тараққиёт пойдеворини яратиш ва ижтимоий барқарорликни таъминлаш жараёнини бошлаб берди.
2016 йилдан бошлаб Президент Шавкат Мирзиёев раҳбарлигида мамлакатда “Янги Ўзбекистон” тамойили асосида кенг қамровли ислоҳотлар амалга оширилмоқда. Ушбу жараёнда Ўзбекистон Марказий Осиёда изчил ва мувозанатли ривожланиш йўлидан бораётган давлат сифатида эътироф этилмоқда.
Муаллиф Ўзбекистонда сўнгги йилларда иқтисодиётни либераллаштириш, инвестицияларни жалб этиш, савдо-иқтисодий алоқаларни кенгайтириш, инфратузилмани модернизация қилиш, рақамлаштириш ва тадбиркорлик муҳитини яхшилаш борасида амалга оширилган чора-тадбирларга эътибор қаратган.
Мақолада аҳолини ижтимоий ҳимоя қилиш тизимини такомиллаштириш, таълим ва соғлиқни сақлаш хизматлари сифатини ошириш, ёшлар ҳамда хотин-қизларнинг жамиятдаги фаоллигини кучайтиришга қаратилган ислоҳотлар ҳақида ҳам алоҳида фикр юритилган.
Нашрда Президент Шавкат Мирзиёев томонидан илгари сурилган “Учинчи Ренессанс” ғояси Ўзбекистон тараққиётининг муҳим стратегик йўналишларидан бири сифатида баҳоланган. Унда Хоразмий, Беруний, Ибн Сино, Имом Бухорий ва Имом Термизий каби буюк алломалар етишиб чиққан юрт бугунги кунда илм-фан, инновация, технология ва инсон капиталини ривожлантириш орқали янги уйғониш даврини яратишга интилаётгани қайд этилган.
Ироқ матбуоти Ўзбекистоннинг ислом цивилизацияси тарихидаги ўрнига ҳам тўхталиб, мамлакатда бой илмий-маърифий меросни ўрганиш ва тарғиб қилишга қаратилган лойиҳалар амалга оширилаётганини таъкидлаган. Жумладан, Тошкент шаҳрида бунёд этилган Ислом цивилизацияси маркази Мовароуннаҳр алломаларининг жаҳон тамаддунига қўшган улкан ҳиссасини намойиш этувчи муҳим илмий-маданий маскан сифатида қайд этилган.
Ўзбекистон мусулмонлари идораси Матбуот хизмати
Иймон 
Намоз 
Рўза 
Закот 
Ҳаж 
Қуръон 
Ислом сабоқлари 
Aлоқа 