Туркиянинг Хатай вилоятида Ўзбекистон томони иштирокида қурилган янги масжид фойдаланишга топширилди.

Масжидга Туркиянинг мураккаб даврларидан бирида ўзбек халқи кўрсатган беғараз ёрдами ва бирдамлиги учун миннатдорлик рамзи сифатида “Бухоро” номи берилди.

Ибодат маскани 3200 га яқин хонадонни ўз ичига олган йирик турар-жой массивининг марказида жойлашган бўлиб, бир вақтнинг ўзида 500 кишини ўз ичига сиғдира олади. Бино замонавий архитектура, қулай шароитлар ва эстетик дизайни билан ажралиб туради.

Очилиш маросимида иштирокчилар томонидан мазкур лойиҳа икки давлат ўртасидаги дўстона муносабатлар ва гуманитар ҳамкорлик янада мустаҳкамланишига хизмат қилиши таъкидланди.

Б.Худойбердиев, ЎзА