Исломда йўқ...
1. Жаҳолатдан кўра ёмонроқ фақирлик йўқ.
2. Ақлдан кўра фойдалироқ мол йўқ.
3. Ўзига бино қўйишдан кўра ёмонроқ ёлғизлик йўқ.
4. Маслаҳатдан кўра ишончлироқ бир-бирини қўллаш йўқ.
5. Гўзал хулқдек насл-насаб йўқ.
6. Ўзини тия билишдек тақво йўқ.
7. Тафаккурдек ибодат йўқ.
8. Балоғатга етгандан сўнг етимлик йўқ.
9. Фатҳдан сўнг ҳижрат йўқ.
10. Омонатга хиёнат қилувчида иймон йўқ.
11. Ваъдасига вафо қилмайдиган одамда дин йўқ.
12. Уч кундан ортиқ аразлашиб юриш йўқ.
13. Истиғфор билан гуноҳи кабира йўқ.
14. Қуръон ўқиб юрган банда учун муҳтожлик йўқ ва у учун Қуръондан ортиқроқ бойлик йўқ.
15. Аллоҳ учун дуодан ўзга ёқимлироқ нарса йўқ.
16. Зулмдан ҳам кўра жазоси тезроқ келадиган нарса йўқ.
17. Ўзгаларнинг оч қорнини тўйдиришдан кўра афзалроқ амал йўқ.
Даврон НУРМУҲАММАД
Озарбайжонлик журналистлар Самарқанддаги Имом Бухорий мақбарасини зиёрат қилди
"Report" хабарига кўра, ташриф Ўзбекистон бўйлаб медиа-тур доирасида бўлиб ўтди.
Имом Бухорий мақбараси Самарқанд вилоятидаги энг муҳим маънавий ва тарихий обидалардан биридир.
Ташриф давомида Озарбайжон оммавий ахборот воситалари вакиллари Имом Бухорий мақбараси, масжид, музей ва кутубхона вазифасини бажарувчи хонани ўз ичига олган ёдгорлик мажмуаси ҳудуди билан танишди. Журналистларга мажмуанинг яратилиш тарихи, Имом Бухорий ҳаёти ва илмий мероси, шунингдек, унинг ислом илм-фанидаги алоҳида ўрни ҳақида сўзлаб берилди.
Медиа-тур иштирокчилари мажмуанинг музей қисмига алоҳида эътибор қаратди. Бу ерда ислом маданияти ва Имом Бухорий меросига оид қўлёзмалар ва турли тарихий материаллар тақдим этилган. Шунингдек, музейда турли мамлакатлар вакиллари томонидан мажмуага совға қилинган Қуръони карим нусхалари ҳам сақланади.
Иштирокчиларга мажмуа турли мамлакатлардан келган диндорлар учун зиёратгоҳ ва алломанинг маънавий меросини асраб-авайлашнинг муҳим маркази эканлиги ҳақида сўзлаб берилди. Журналистлар мажмуанинг меъморий хусусиятлари ва ташриф буюрувчилар учун яратилган замонавий инфратузилма билан ҳам танишди.
Имом Бухорий энг нуфузли ислом уламоларидан бири ва ислом анъанасидаги энг муҳим ҳадис тўпламларидан бири бўлган "Саҳиҳ ал-Бухорий" ҳадислар тўпламининг муаллифи ҳисобланади.
Ўзбекистон мусулмонлари идораси Матбуот хизмати
