И.М.Губкин номидаги Россия давлат нефть ва газ университетининг Тошкент шаҳридаги филиалида Халқаро бағрикенглик кунига бағишланган “Турли эътиқодлар – умумий келажак: ҳурмат ва мулоқот маданияти” мавзусида динлараро мулоқот тадбири ташкил этилди, хабар бермоқда ЎзА.

Тадбирни ўтказишдан кўзланган мақсад жамиятда динлараро бағрикенглик, миллатлараро тотувлик, ўзаро ҳурмат ва ҳамжиҳатлик тамойилларини мустаҳкамлаш, турли диний конфессиялар вакиллари ўртасида очиқ мулоқотни ривожлантириш ҳамда ёшлар орасида тинчлик ва бағрикенглик қадриятларини кенг тарғиб этишдан иборат бўлди.

Тадбирни университет филиалининг ижрочи директори Абдулла Мағрупов очиб, иштирокчиларни қутлади. Филиалнинг ижрочи директори ўз нутқида жамиятда тинчлик ва осойишталикни асраш, турли миллат ва дин вакиллари ўртасида ўзаро ҳурматни мустаҳкамлаш, ёшларни умуминсоний қадриятлар руҳида тарбиялаш ҳамда таълим муассасаларида бағрикенглик муҳитини ривожлантиришнинг аҳамияти ҳақида сўз юритди.

Тадбирда Ўзбекистондаги турли диний конфессиялар ва Ўзбекистон мусулмонлари идораси вакиллари иштирок этиб, динлараро ҳамжиҳатлик, диний бағрикенглик, тинчлик ва ўзаро мулоқот маданиятига оид мавзуларда маърузалар қилди.

Маърузалар давомида турли эътиқод вакиллари ўртасида ўзаро ҳурмат ва ишончни мустаҳкамлаш, жамиятда тинчлик ва барқарорликни таъминлаш, маънавий қадриятларни асраб-авайлаш ҳамда ёш авлодни инсонпарварлик руҳида тарбиялаш масалалари муҳокама қилинди.

Ўзбекистон мусулмонлари идораси матбуот хизмати