O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining tashabbuslari bilan tizimda faoliyat yuritayotgan imom-xatiblar va imom noiblarining kasbiy mahoratini oshirish hamda Qur’oni karim qiroatini yanada mukammallashtirishga qaratilgan tizimli o‘quv mashg‘ulotlari davom etmoqda.

Mazkur loyiha imomlarning nafaqat ilmiy salohiyatini yuksaltirish, balki tajvid qoidalarini amaliyotda go‘zal va bexato qo‘llash ko‘nikmalarini puxtalashga xizmat qilmoqda.

Reja asosida tashkil etilayotgan navbatdagi darslar shu kunlarda Qoraqalpog‘iston Respublikasi va Toshkent shahrida yuqori saviyada o‘tkazilmoqda. Qur’on va tajvidni o‘rgatish hamda Masjidlar bilan ishlash bo‘limlari hamkorligida tashkil etilgan ushbu mashg‘ulotlarni malakali mutaxassislar – Abdulloh qori Haydarov, Abdusamad qori Mamasoliyev va Abdulbosit qori Eshqobilov olib bormoqda.

Ushbu o‘quv jarayonidan ko‘zlangan asosiy maqsad — masjidlardagi qiroatlar sifatini yuqori bosqichga ko‘tarish va soha xodimlarining tajvid ilmi bo‘yicha nazariy hamda amaliy bilimlarini yanada mustahkamlashdir.

Bu kabi amaliy saboqlar diniy soha xodimlarining ma’naviy va ilmiy rivojida muhim pog‘ona bo‘lib, respublikamizning boshqa hududlarida ham izchillik bilan davom ettiriladi.

O‘zbekiston musulmonlari idorasi
Matbuot xizmati