Erkin va farovon hayot barpo etish yo'lida ildamlab borayotgan O'zbekistonimiz tarixan juda qisqa davrda ulkan yutuqlarga erishmoqda. Milliy ma'naviyatimiz va qadriyatlarimiz tiklanib, o'zligimizga qaytdik. Tinchlik va barqarorlik qaror topdi.

Ayni paytda, osuda hayotimizni izdan chiqarishga urinayotgan yovuz kuchlarning mavjudligini ham unutmasligimiz lozim. Shu jihatdan, tinchlikni asrash bugungi kunning dolzarb va ahamiyatli vazifalaridan biri ekanligini unutmasligimiz lozim.

Yurtimizga nisbatan tahdidlar aqidaparastlik, mutaassiblik, ekstremizm va terrorchilik va internet orqali hujum  kabi ko'rinishlarda namoyon bo'lmoqda. Buni islom dinini niqob qilib, O'zbekistonni demokratik taraqqiyot yo'lidan og'dirishdek g'arazli maqsadni ko'zlab faoliyat olib borishga intilayotgan ekstremistik tashkilotlar harakati misolida yaqqol ko'rish mumkin. Ular o'zlarining buzg'unchi g'oyalarini tarqatishga irodasi bo'sh, din haqidagi bilimlari sayoz kishilarni ta'sir doirasiga tortishga harakat qilmoqdalar. Horijdagi terrorchi va ekstremistik kuchlar hamda markazlar qo'llab-quvvatlayotgan bunday oqimlar o'zlarining yovuz maqsadlarini amalga oshirish yo'lida juda katta kuch va mablag' sarf qilayotganini alohida qayd etish lozim.

Hushyorlikni ta'minlash masalasida mayda-chuyda degan narsalar bo'lmaydi. Zero, "Bir gugurt bir qishloqni yondiradi", deydilar... Shunday bo'lsa-da, afsuski, hali-hanuz beg'amlik, loqaydlik, sodir bo'layotgan hodisalarni ko'rib ko'rmaslikka olish kabi illatlar mavjudligini, oramizda tinchlik va osoyishtalikni ta'minlashni faqat davlat ishi deb o'ylaydiganlar ham bor. Ammo jamiyatda loqayd kimsalar borligining o'ziyoq taraqqiyotga jiddiy xavf solishi hammaga ayon. Luqmoni Hakimdan "Odamlarning eng yaramasi, eng yomoni kim?" deb so'radilar. U kishi: "Odamlarning yomonlik qilayotganini ko'ra turib, ko'rmaslikka olgani, beparvo, loqayd bo'lganidir", deb javob berdilar.

Darhaqiqat, beparvolik va beg'amlik barcha davrlarda yuzaga kelgan kulfat va musibatlarning asosiy sababchisi bo'lgan. Donishmandlardan birining "Dushmanlardan qo'rqma – nari borsa, seni o'ldirishi mumkin. Do'stlardan qo'rqma – nari borsa, senga xiyonat qilishi mumkin. Biroq, befarq odamlardan qo'rq – ular seni o'ldirmaydi ham, sotmaydi ham, faqat ularning jim va beparvo qarab turishi oqibatida Yer yuzida xiyonat va qotilliklar sodir bo'laveradi", degan fikri ham befarqlik keltirib chiqaradigan oqibatlarning dahshatini tasavvur qilish imkonini beradi.

Ba'zi odamlar "tinchlik-osoyishtalikni asrash" deganda qo'lda kurol bilan mamlakat chegarasini qo'riqlash, fuqarolar xavfsizligini ta'minlashni tushunadi. Aslida tinchlikni asrash faqat harbiy mudofaa degani emas. Osuda hayotni himoya qilish faqat harbiylar, huquq-tartibot idoralarining zimmasidagi vazifa emas! Osoyishtalik jami ezgu niyatlar va tilaklarimiz amalga oshishining asosi va manbai ekan, uni asrab-avaylash har bir kishining muqaddas burchidir. Shuning uchun ham, bugungi kunda har bir inson "yurtim tinch – men tinch", degan haqiqat bilan yashashi, o'z uyi, mahallasi, Vatan xavfsizligi uchun qayg'urishi, bu ishni burchi deb bilishi zarur.

Farzandlarimizni fidoyilik, vatanparvarlik, tadbirkorlik, millatparvarlik, Vatanga sadoqatga o'rgatish ko'p jihatdan ota-onalarga bog'liq. «Bekordan Hudo bezor», deydi dono xalqimiz. Yoshlarimiz turli mutaassib guruhlar ta'siriga tushib qolmasligi uchun ularning bo'sh vaqtini unumli o'tkazishga, kasb-hunarga, foydali mehnatga o'rgatish, turli to'garaklarga sport klublariga jalb qilish g'oyat muhim.

Yurtimizda yashayotgan har bir fuqaro o'z kasbini sidqidildan bajarib, yurt ravnaqi uchun harakat qilib, loqayd bo'lmasdan atrofdagi voqealarga teran nigoh bilan qarab, hushyor bo'lib yashasa, tinchlik-osoyishtaligimiz barqaror bo'ladi.

 Odiljon  Narzullayev

Yangiyul  tuman ‘’ IMOM SULTON’’ jome masjidi  Imom  xatibi