Muftiy hazratlari Afg'oniston delegatsiyasini qabul qildi
Kecha, 18 may kuni O'zbekiston musulmonlari idorasi raisi, muftiy Usmonxon Alimov hazratlari Afg'oniston Islom Respublikasi Milliy yarashuv oliy kengashi raisi maslahatchisi Muhammad Muhsin Donesh janoblari boshchiligidagi delegatsiyani qabul qildilar.
Muloqot davomida muftiy Usmonxon Alimov hazratlari Afg'oniston ulamolarini tashrif bilan qutlab, ikki davlat o'rtasidagi hamkorlik aloqalarini rivojlantirish, qardosh xalq o'rtasidagi do'stlik rishtalarini mustahkamlash borasida amalga oshirilayotgan ishlar to'g'risida so'z yuritdilar. O'zbekiston hukumati va xalqi Afg'onistonda doimo tinchlik bo'lishi tarafdori ekani va bu yo'lda qo'lidan kelgan barcha sa'y-harakatlarni amalga oshirishi, ekstremizmga qarshi kurashda ulamolarning hamkorligini rivojlantirish har tomonlama manfaatli ekani, bunday ishlar bundan keyin ham davom etishini ta'kidladilar.
Muhammad Muhsin Donesh samimiy qabul uchun minnatdorlik bildirib, ikki xalqni mushtarak ildizlar birlashtirib turishi, oxirgi yillarda do'stoni aloqalar rivojlanib borayotgani haqida so'zladilar. Shuningdek, ushbu tashrifdan maqsad ikki davlat ulamolari hamkorligini rivojlantirish, ekstremizmga qarshi kurash ishlarida aloqalarni mustahkamlash, diniy soha xodimlari o'rtasida o'zaro tajriba almashish ekanini qayd etdilar.
Shuningdek, uchrashuvda Balh viloyati haj va vaqf boshqarmasi boshlig'i Mahmud Doneshju Muhammad Bunyod so'z olib, O'zbekiston zamini qadimdan Islom dini tamadduni markazi bo'lib kelgani, Movarounnahr va Balh ulamolarining asarlari 200 dan ziyod mamlakatda o'qitilishi, ularning ilmiy merosi taraqqiyot uchun zamin bo'lishini ta'kidladilar.
Uchrashuv davomida mehmonlar O'zbekistonda diniy sohadagi ishlar, xususan, masjid-madrasalar faoliyati, ilmiy markazlar va ixtisoslashgan maktablar ishlari haqida eshitib, juda ham quvonganlari, Islom dinining mo''tadil g'oyalarini xalqqa etkazilishi o'zining ijobiy samarasini berayotgani, qadimda O'zbekiston zamini Islom dinining siymosi, ulamolari esa din peshvosi bo'lgani, bugungi kunda ham O'zbekiston ana shu yo'ldan ketayotganini yana bir bor tasdiqladilar.
Do'stona va samimiy ruhda o'tgan uchrashuv davomida muhokama etilgan mavzularda hamkorlik qilish bo'yicha o'zaro kelishib olindi.
O'zbekiston musulmonlari idorasi matbuot xizmati
“Solombo Times”: O‘zbekistonda “Uchinchi Renessans” g‘oyasini amalga oshirish davlat siyosatiga aylangan
Shri-Lankaning “Solombo Times” nashrida “O‘zbekistonda Yangi uyg‘onish davri: kelajak texnologiyalari yordamida buyuk o‘tmishni qayta tiklash” sarlavhali tahliliy maqola e’lon qilindi, deb xabar bermoqda “Dunyo” AA.
Shri-Lankalik taniqli jurnalist Fazan Navaz tomonidan yozilgan ushbu materialda so‘nggi o‘n yilda O‘zbekistonda Prezident Shavkat Mirziyoyev tashabbusi bilan Yangi O‘zbekistonni bunyod etish, “Uchinchi Renessans” g‘oyasini amalga oshirishga qaratilgan islohotlar va ularning samarali natijalari xususida so‘z yuritilgan.
Muallifning yozishicha, Markaziy Osiyo markazida sokin, ammo ulkan ahamiyatga ega inqilob yuz bermoqda. Bu kurash qurol-yarog‘ bilan emas, balki qo‘lyozmalar, muzeylar va mikrochiplar yordamida amalga oshirilmoqda.
Prezident Shavkat Mirziyoyev rahbarligida O‘zbekiston Samarqand va Buxoro kabi shaharlar jahon ilm-fani, she’riyati va falsafasining yetakchi markazlari bo‘lgan O‘rta asrlardagi “Oltin asr” shon-shuhratini qayta tiklashga intilmoqda.
Bu jarayonning o‘ziga xos jihati shundaki, O‘zbekiston ming yildan ziyod tarixga ega madaniy merosni asrash, qayta tiklash va keng ommaga yetkazish uchun sun’iy intellekt hamda raqamli texnologiyalardan faol foydalanmoqda.
Nashrda O‘zbekistonning boy madaniy va tarixiy merosi hamda uni saqlash bo‘yicha islohotlarga to‘xtalib o‘tilgan. Qayd etilganidek, bu zamin insoniyat tarixidagi eng buyuk allomalarga beshik bo‘lgan. Astronom va davlat arbobi Mirzo Ulug‘bek Samarqandda yulduzlarni hayratlanarli darajada aniq kuzatish imkonini bergan rasadxona barpo etgan. Xorazmdagi Ma’mun akademiyasi olimlari esa Yevropada Renessans boshlanishidan ancha avval matematika va tibbiyot sohalarida yuksak yutuqlarga erishgan edi.
O‘zbekiston yetakchisi bu tarixiy merosni tez-tez tilga olib, Mirzo Ulug‘bekni nafaqat buyuk olim, balki ilm-fanni eng yuksak qadriyat deb bilgan davlat arbobi sifatida ta’riflaydi. Davlat rahbari bugungi yangilanish jarayonini “Uchinchi Renessans” deb atab, uni O‘zbekistonning ilmu ma’rifat va madaniyat markazi sifatidagi mavqeini qayta tiklashga qaratilgan umummilliy loyiha sifatida baholaydi. Tarixchilar ta’biri bilan aytganda – bu atama mintaqada avval mavjud bo‘lgan ikki buyuk yuksalish davridan keyingi navbatdagi uyg‘onish bosqichini anglatadi.
Muallifning fikricha, O‘zbekistonda Uchinchi Renessans g‘oyasini amalga oshirish shunchaki gap emas, balki davlat siyosatiga aylangan.
“Bu ulkan maqsadning eng yorqin ramzi joriy yil Toshkentda qad rostlagan Islom sivilizatsiyasi markazidir. 2026 yil mart oyida 40 mamlakatdan tashrif buyurgan 1500 dan ortiq mutaxassis ishtirokida qurib bitkazilgan mazkur markaz o‘z bag‘rida islom olamining eng noyob yodgorliklaridan biri – VII asrga mansub Usmon Mus'hafini saqlaydi. Shuningdek, bu yerda ilmiy laboratoriyalar, restavratsiya ustaxonalari va arxivlar faoliyat yuritadi. Markaz allaqachon dunyodagi eng chiroyli yangi muzeylardan biri sifatida e’tirof etilgan”, – deya qayd etgan jurnalist.
Materialda ta’kidlanishicha, O‘zbekiston yondashuvining boshqalardan ajratib turadigan muhim jihati – bu sun’iy intellektdan iqtisodiy taraqqiyot vositasi sifatidagina emas, balki madaniy merosni muhofaza qilish vositasi sifatida ham foydalayotganidadir.
Sun’iy intellekt turizm sohasini ham tubdan o‘zgartirmoqda. Bu tashabbus 2026 yilda mamlakatga 12 million sayyohni jalb qilish rejasining bir qismi hisoblanadi.
Fazan Navaz o‘z maqolasini “Uchinchi Renessans” o‘z oldiga qo‘ygan maqsadlarga to‘liq erishadimi-yo‘qmi, buni vaqt ko‘rsatadi. Biroq bugunning o‘zidayoq O‘zbekiston qanday yo‘ldan odimlab borayotgani aniq ko‘rinib turibdi”, – degan so‘zlar bilan yakunlagan.
O‘zbekiston musulmonlari idorasi Matbuot xizmati
- «
- »