Bismillahir Rohmanir Rohiym.
Alloh taologa bitmas-tuganmas hamdu sanolar bo'lsin.
Payg'ambarimizga mukammal va batamom salavotu durudlar bo'lsin.
Aziz mo'min musulmonlar, barchangizni muborak Sha'bon oyi — ibodat oyi bilan tabriklaymiz!
Islomda fazilatli oylardan biri bu — Sha'bondir.
Olimlardan biri shunday degan: «Rajab oyi badanni, Sha'bon oyi qalbni, Ramazon oyi esa ruhni tozalaydi. Agar Rajab oyida badan, Sha'bon oyida qalb tozalanmasa, Ramazon oyida ruh qanday tozalanadi?
Nabiy sollallohu alayhi vasallam bu oyning ko'prog'ini ro'za tutish bilan o'tkazardilar.
Oisha roziyallohu anho aytadilar: «Men Rasululloh sollallohu alayhi vasallamning Ramazon oyidan boshqa oyda to'la ro'za tutganlarini ko'rmaganman. Boshqa oylarda Sha'bondan ko'ra ko'proq ro'za tutganlarini ko'rmaganman».
Buxoriy va Muslim rivoyat qilishgan.
Usoma ibn Zayd roziyallohu anhu aytadilar: «Men Rasululloh sollallohu alayhi vasallamga dedim: «Ey Allohning Rasuli, boshqa biror oyda Sha'bonchalik ko'p ro'za tutganingizni ko'rmaganman?».
Payg'ambarimiz sollallohu alayhi vasallam dedilar: «Odamlar Rajab va Ramazon oylari orasidagi ushbu oy — Sha'bondan g'ofil bo'lib qoladilar. Bu shunday oydirki, unda bandalarning amallari olamlar Parvardigori huzuriga olib chiqiladi. Meni ham amallarim Allohning huzuriga olib chiqilganda ro'zador bo'lishni yaxshi ko'raman».
Abu Dovud, Nasoiy, Ibn Huzayma rivoyati.
Sha'bon — Muhammad sollallohu alayhi vasallamning oylari hisoblanadi.
Ushbu oy haqida Allohning Rasuli: «Sha'bon oyi mening oyimdir», deganlar.
Ummu Salama roziyallohu anho:
«Nabiy sollallohu alayhi vasallamning Sha'bon va Ramazondan boshqada ikki oy ketma-ket ro'za tutganlarini ko'rmadim», dedilar».
Termiziy yaxshi sanad bilan rivoyat qilgan.
Sha'bon va Ramazon oylari ketma-ket kelishi ma'lum, Payg'ambarimiz alayhissalom shu ikki oyning ro'zasini tutgan ekanlar. Bundan ham Sha'bon oyi ro'zasining fazilatli ekanligini bilib olamiz.
Sha'bon oyida ibodat qilgan, ro'za tutgan, Rasululloh sollallohu alayhi vasallamga salovot aytgan, umuman ushbu oyning barcha amallarini bajargan bandalarga ulug' mukofotlar va'da qilingan. Bu haqda hadisi quddisiyda Alloh taolo ishorat qilib: «Qarang, ko'ring, mening qullarim Rasulimning oyi bo'lmish Sha'bon oyiga qanday hurmat va e'tibor ko'rsatyaptilar. Jalolim haqqi, men ham ularni avf etdim».
Robbimiz barchamizga Sha'bon oyini munosib o'tkazishimizga yordam bersin va Ramazonga ham chiroyli, gunohlardan pok holatda etkazsin!
Manba:
«Hadis va Hayot» kitobi.
«Hijriy 1442» taqvim.
Hurshid Ma'ruf tayyorladi
“Yangi O‘zbekistonning fidoyisi bo‘lib, ma’naviyat targ‘ibotchisiga aylanamiz” tashabbusi doirasida Respublikamiz hojilari ishtirokida o‘tkazilayotgan ma’naviy-ma’rifiy targ‘ibot tadbirlari qizg‘in davom etmoqda.
Aytib o‘tish joizki, 2024 yilning 18 iyulidan 2025 yilning 6 fevraliga qadar o‘tkazilgan 65 ming 729 ta tadbir doirasida 402 931 nafar yurtdoshimiz qamrab olindi. Ularning oilaviy sharoitlaridan kelib chiqib, tinchlik qadri va shukronalik, yoshlar tarbiyasi, illatlarga barham berish, ilm-ma’rifatga targ‘ib, yot g‘oyalarga qarshi kurashish mavzularida suhbatlar o‘tkazildi. Ehtiyojmandlar holidan xabar olinib, oziq-ovqat mahsulotlari, moddiy yordamlar berildi.
Ushbu xayrli ishlarga diniy soha vakillari bilan bir qatorda 11 mingdan ziyod hojilar jalb etilgan bo‘lib, ular mahallalarda amaliy ishlarda ko‘ngilli ravishda ishtirok etishmoqda. Nizoli oilalarni yarashtirishda, yot unsurlar ta’siriga tushib qolganlarni to‘g‘ri yo‘lga qaytarishda muhtaram hoji ota-onalarimizning ko‘maklari katta bo‘lmoqda.
O‘zbekiston musulmonlari idorasi
Matbuot xizmati