Bugungi kunda O‘zbekiston ochiqlik va xalqaro hamkorlik siyosatini izchil davom ettirar ekan, dunyo miqyosidagi yetakchi davlatlar va mintaqalar bilan amaliy muloqotni kengaytirishga alohida e’tibor qaratmoqda. Prezidentimiz tashabbusi bilan strategik sheriklik aloqalari yangi mazmun kasb etib, iqtisodiy, investitsiyaviy va ma’naviy sohalarda yangi yo‘nalishlar ochilmoqda.

Shu yo‘nalishdagi muhim qadamlardan biri sifatida davlatimiz rahbari Shavkat Mirziyoyevning AQSHning Yuta shtatidagi Iso Masih Oxirgi zamon avliyolari cherkovi rahbari, oqsoqol Devid Bednar va "Stirling" xalqaro xayriya fondi raisi Mayls Xansendan iborat ishbilarmonlar delegatsiyasini qabul qilishi ham katta ahamiyat kasb etdi.

Muloqot chog‘ida O‘zbekiston – AQSH strategik sheriklik munosabatlari izchil rivojlanib borayotgani ta’kidlandi. Shu jarayonda Yuta shtati bilan savdo-iqtisodiy va investitsiyaviy hamkorlikni kengaytirish, raqamlashtirish, ta’lim va ijtimoiy himoya sohalarida qo‘shma loyihalarni amalga oshirish istiqbollari muhokama qilindi.

Shuningdek, innovatsiyalar, tog‘-kon sanoati, xotin-qizlar tadbirkorligi, inklyuziv ta’lim, sog‘liqni saqlash, suv ta’minoti va sanitariya kabi yo‘nalishlarda hamkorlik uchun katta salohiyat mavjudligi qayd etildi. Uchrashuv yakunida hududlararo aloqalarni yanada rivojlantirish maqsadida Yuta shtati gubernatori boshchiligidagi delegatsiyaning O‘zbekistonga tashrifini tashkil etish bo‘yicha kelishuvga erishildi.

Muzaffar Kamilov,

O‘zbekiston xalqaro islomshunoslik akademiyasi rektori,

xalqaro ICESCO tashkiloti Ijroiy kengashi a’zosi

Manba: "Yangi O‘zbekiston" gazetasi