Shu kunlarda o'lkamizning turli hududlarida diniy soha xodimlari “Yashil makon” umummilliy loyihasi doirasida kuzgi ko'chat ekish ishlarida faollik bilan ishtirok etmoqdalar. O'tgan Ulamolar Kengashida ta'kidlanganidek, ushbu loyiha imom-domlalar o'rtasida "Tabiat – Alloh taoloning omonatidir" shiori ostida keng jabhada amalga oshirilmoqda.

Shu munosabat bilan bugun O'zbekiston musulmonlari idorasining Namangan viloyat vakilligi tashabbusi bilan Chortoq tumanidagi “O'rikzor” MFY hududida “Yashil makon” umummilliy loyihasi doirasida ko'chat ekish tadbiri tashkil etildi. Tadbir davomida 5 gektar joyga 1500 tupdan ortiq mevali ko'chatlar ekildi.

Darhaqiqat, Alloh taolo insonni erdan yaratar ekan, uning zimmasiga yana shu qaytadigan joyi – erni obod qilish vazifasini yukladi. Bu haqda Alloh taolo shunday marhamat qiladi: “U sizlarni erdan paydo qildi va unga sizni obodligi uchun qo'ydi” (“Hud” surasi 61-oyat). Boshqa oyati karimada: “Yerni yaroqli qilib qo'ygandan keyin unda buzg'unchilik qilmangiz!” (“A'rof” surasi 56-oyat), deb keltirilgan. Alloh taolo ushbu ikki oyati karimada er va uni o'rab turgan tabiatni asrab-avaylashga, undan oqilona foydalanishga buyuradi. Shuning barobarida unga zarar etkazishning har qanday turidan qaytaradi.

Yer va undagi barcha ne'matlarni kelajak avlodga sof holatda etkazish har bir inson oldidagi muhim vazifalaridandir. Ayniqsa, bu imon-e'tiqodli kishilar qalbida ulkan mas'uliyat hissini oshiradi.

So'nggi yillarda jahonda kuzatilayotgan iqlim o'zgarishi bilan bog'liq global muammolar, afsuski, yurtimizni ham chetlab o'tayotgani yo'q. Ro'y berayotgan chang-to'zonlar, shuningdek, yog'ingarchilikning kamayib yoki ko'payib ketayotgani so'zimiz tasdig'idir. Bu holat har bir aqli raso kishini befarq qoldirmasligi turgan gap.

Ushbu tadbirda Din ishlari bo'yicha qo'mitaning viloyat boshqarmasi mutaxassislari, O'zbekiston musulmonlari idorasining viloyat vakilligi mas'ullari, shahar-tuman bosh imom-xatiblari, viloyat masjidlarining imom-xatib, imom-noib va mutavallilari ishtirok etdilar.

Jarayonda viloyat hokimining o'rinbosari J.Aloydinov, viloyat bosh imom-xatibi M.Abbasitdinov so'zga chiqib, o'z tilaklarini bildirdilar.

Yurtimiz bo'ylab keng miqyosda o'tkazilayotgan “Yashil makon” umummilliy loyihasi doirasida amalga oshirilayotgan bu kabi xayrli tadbirlar hududlar qiyofasini obod etish barobarida, tabiatni asrab-avaylash, ekologik musaffolikni ta'minlashga ko'mak berishi bilan ahamiyatlidir. Mana shunday tadbirlar yurtimiz bo'ylab davom etmoqda.

Alloh taolo barchamizni poklikka intiluvchi, bilganlariga amal qiluvchi, jismu imoni, uy-joyi – Vatanini toza tutuvchi, bog'u rog'lar o'stiruvchi va Yer yuzini obod qiluvchilardan qilsin!

O'zbekiston musulmonlari idorasining
Namangan viloyat vakilligi
Matbuot xizmati