هل تحب الله ؟
Rasululloh sollallohu alayhi vasallam: "Kim bomdod namozini jamoat bilan o'qisa, so'ngra quyosh chiqquncha Allohni zikr qilib o'tirsa, keyin ikki rakat namoz o'qisa, uning uchun haj va umraning ajridek bo'lur. To'liq, to'liq, to'liq", deganlar.
Demak, bomdod namozini o'qib bo'lib, Allohni zikr qilasiz. Allohni zikr qilishning eng afzali Qur'on tilovatidir.
Quyosh chiqqandan so'ng, bir necha daqiqa kutib, ikki rakat nafl namoz o'qiysiz. Natijada haj va umra savobiga hamda boshqa ko'plab ajrlarga ega bo'lasiz. Gunohlaringiz o'chiriladi. Alloh taolo yomon amallaringiz o'rnini yaxshiliklar bilan to'ldiradi.
Ammo bunga amal qiladiganni men kabi boshqa odam bilan solishtirib ko'ring. Bomdod namozini o'qiydi-da, kechasi bilan bedor bo'lganman, charchadim deydi-yu, krovatiga sakraydi va uyquga ketadi. Bu voqelik.
Aziz birodarlar.
"Kim bir narsani sevsa, uni ko'p zikr qiladi" degan qoida bor. Siz Allohni sevasizmi yoki yo'q-mi?
Agar chindan ham Allohni sevsangiz, Uni ko'p zikr qilishingiz kerak. Agar ko'p zikr qilmasangiz, demak sevmas ekansiz.
Banda Yaratuvchisini tanisa-yu, lekin Uni sevmasligi mumkin-mi? Shunday bo'lishi mumkin-mi? Shunday bo'lishi mumkin-mi? Allohni tanisangiz, Uning quli ekanligingizni bilsangiz, Uning mehribon va rahmliligini, lutfu inoyatini ko'rsangiz Uni sevmaysiz-mi?
Yaxshi, agar sevsangiz, Uni ko'p zikr qiling!
O'zbekiston musulmonlari idorasi Matbuot xizmati
#xabar #shvetsiya
Shu yilning 24 mart kuni O‘zbekiston delegatsiyasining Shvetsiyaga tashrifi doirasida ikki davlat o‘rtasidagi diniy-ma’rifiy va ijtimoiy aloqalarni mustahkamlashga qaratilgan muhim uchrashuvlar bo‘lib o‘tdi. Dastlab Shvetsiya Tashqi ishlar vazirligining Dinlararo muloqot bo‘yicha maxsus vakili, elchi Kristian Kamil hamda vazirlikning Markaziy Osiyo va Yaqin Sharq yo‘nalishi mas’ullari bilan muloqot o‘tkazildi.
O‘zbekiston musulmonlari idorasi raisi, muftiy Shayx Nuriddin Xoliqnazar hazratlari va Din ishlari bo‘yicha qo‘mita raisining birinchi o‘rinbosari Davronbek Maxsudov boshchiligidagi delegatsiya a’zolari mamlakatimizda “Jaholatga qarshi ma’rifat” tamoyili asosida olib borilayotgan islohotlar, dinlararo bag‘rikenglik va vijdon erkinligini ta’minlash borasidagi ijobiy o‘zgarishlar haqida batafsil ma’lumot berdilar. Shvetsiya tomoni O‘zbekistonning turli konfessiyalar vakillari uchun yagona oila muhitini yaratish va mintaqa davlatlarini birlashtirishdagi yetakchilik rolini yuqori baholab, diniy sohadagi ochiq va erkin muloqotga tayyorligini bildirdi.
Kunning ikkinchi yarmida Shvetsiya Parlamenti vitse-spikeri Yuliya Kronlid bilan bo‘lib o‘tgan uchrashuvda parlamentlararo hamkorlikni rivojlantirish va ijtimoiy-diniy sohadagi islohotlarning amaliy natijalari muhokama qilindi.
Muloqot chog‘ida O‘zbekiston Prezidenti tashabbusi bilan so‘nggi yillarda e’tiqod erkinligini ta’minlash, masjid-madrasalarni obod etish va diniy ta’limni rivojlantirish borasida amalga oshirilgan tarixiy islohotlar alohida e’tirof etildi.
Shuningdek, Shvetsiyada istiqomat qilayotgan va mehnat qilayotgan vatandoshlarimizning ma’naviy ehtiyojlarini ta’minlash, ularga sof islom ma’rifatini yetkazish maqsadida O‘zbekiston musulmonlari idorasi va Shvetsiyaning tegishli tashkilotlari o‘rtasida bevosita hamkorlikni yo‘lga qo‘yish masalasi muhokama qilindi.
Diniy konfessiya vakillari bilan ham o‘zaro muloqotlar o‘tkazildi.
Uchrashuv yakunida Oliy Majlis Qonunchilik palatasi vakillari tomonidan parlamentlararo do‘stlik aloqalarini yangi bosqichga olib chiqish bo‘yicha muhim takliflar ilgari surilib, ikki davlat o‘rtasidagi munosabatlarning strategik ahamiyati yana bir bor ta’kidlandi.
O‘zbekiston musulmonlari idorasi
Matbuot xizmati