Bismillahir Rohmanir Rohiym
Sehrni sehr bilan davolanmaydi, balki shariatga muvofiq dam soldirish, “Fotiha”, “Oyatal kursiy”, Baqara surasining oxirgi ikki oyati, “Ixlos”, “Falaq” va “Nas” suralarini o‘qib, o‘ziga dam solish, doimo tahoratli yurish, farz ibodatlarni vaqtida bajarish, ko‘p qiroat va zikru tasbehda bo‘lish tavsiya etiladi.
Tarixdan ma’lumki, Payg‘ambarimiz sallallohu alayhi vasallamni Labiydul yahudiy va uning qizlari o‘n bir tugunli ip bilan sehr qilishganda “Falaq” va “Nas” suralarini o‘qib panoh so‘rashga buyurildilar. U zot ushbu suralarni o‘qib sehrdan xalos bo‘ldilar (“Tafsiri Jalolayn” kitobi).
Avvalo, folbinlik, sehr bilan shug‘ullanadigan kishilardan uzoq bo‘lish, sehr ham Alloh taoloning iznisiz ta’sir qilmasligiga qattiq ishonish kerak.
Sehr bilan shug‘ullanish – oilalarning buzilishi, silai rahmning uzilishiga sabab bo‘ladigan og‘ir jinoyatdir. Hozirgi kunda ham sehrning isitish-sovutish degan turi ko‘p uchraydi. Ba’zi opa-singillarimiz tushunmasdan erimni o‘zimga isitaman, deb folbin-sehrgarga murojat qiladilar.
Ko‘pincha natija teskari bo‘ladi. Aslida, opa-singillarimiz dinimizda tavsiya qilingan, er-xotin o‘rtasida muhabbatni ziyoda qiladigan ishlarga harakat qilishlari kerak.
Eng asosiysi, iymon, ixlos, muhabbat, sabr-toqat, qanoat, bosiqlik, kechirimlilik, mehr, shukr, Allohning taqdiri va taqsimiga rozi bo‘lish, xushmuomalalik, hayo, mehnatsevarlik, oqko‘ngillik kabi xislatlarga ega bo‘lishga harakat qilsalar, erni isitish uchun imonni tahlikaga qo‘yib folbin-sehrgardan yordam so‘rashga hojat qolmaydi.
Folbin va sehrgarlarning bozorini yuritayotganlar, ularning eshiklari oldida turnaqator navbatlar tashkil qilayotganlar kimlar? Afsuski, biz o‘zimiz ularning ishi yurishishiga sabab bo‘lmoqdamiz. Har bir oila boshlig‘i qo‘l ostidagilar uchun mas’ul.
Demak, har bir er yoki ota oila a’zolarini folbin va sehrgarlarga borishidan qaytarishi kerak. Chunki o‘zini ham oila a’zolarini ham do‘zax o‘tidan asrashi uning muqaddas burchidir. Vallohu a’lam.
O‘zbekiston musulmonlari idorasi
Fatvo markazi.
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
