Yurtimizdagi masjidlar asosan to'rt yoki sakkiz burchak shaklida quriladi. Shu qatorda dunyo masjidlarining boshqa zamonaviy uslublari ham shart-sharoitlar hisobga olingan holda kiritilmoqda. Bu esa masjidlar qurish borasida katta tajribaga ega bo'lib borayotgan o'zbek usta-me'morlarining mahorati va bunyodkorlikning hilma-xilligini ifoda etadi.

 Toshkent viloyatining so'lim Zarkent qishlog'ida “Odil ota” masjidi xonaqohi birinchi bor besh burchak shaklida qurilmoqda. “Honaqohning besh burchagi va undagi besh ustun dinimizning besh rukniga mengzatilgan”, deydi imom-xatib Ma'murjon Abdurahmonov.

Katta yo'l labida joylashgan ushbu jomening eng uzun burchagi yaxlit bir ko'rinishda yo'lovchilar e'tiborini o'ziga jalb etadi. Kirmagan kishining kirgisi, bir ko'rgisi keladi. Hozirda qurilish ishlari nihoyasiga yaqinlashib, tashqi fasad qismi bo'yoqdan chiqarilmoqda.

“Eski bino o'rniga yangi masjidni qurish ishlari aslida 2017 yilda boshlangan edi. Orada mablag' etishmovchiligi sabab ishlar bir muddat to'xtab qolgan edi. Mana bugun Alhamdulillah, yakuniga etkazish arafasidamiz. Tashqi ayvon bilan hisoblanganda 1200 namozxonni yangi masjidimiz o'z bag'riga sig'diradi”, deya qo'shimcha qildi Ma'murjon Abdurahmonov.

O'zbekiston musulmonlari idorasi Masjidlar bo'limi