O‘zbekiston musulmonlari idorasi raisi, muftiy Shayx Nuriddin Xoliqnazar hazratlarining tashabbusi bilan yurtimizda milliy sport turlarini keng targ‘ib qilish, sog‘lom turmush tarzini qaror toptirish hamda jismoniy faollikni oshirishga qaratilgan muhim tadbirlar izchil amalga oshirilmoqda. Ayniqsa, milliy qadriyatlarimizdan biri bo‘lgan kurash sportini ommalashtirish maqsadida diniy soha vakillari o‘rtasida musobaqalar tashkil etilayotgani ahamiyatlidir.

Jumladan, Farg‘ona viloyatida diniy soha xodimlari ishtirokida kurash bo‘yicha musobaqaning viloyat bosqichi yuqori saviyada o‘tkazildi. Unda turli yosh va vazn toifalaridagi ishtirokchilar bellashib, o‘z mahorat va jismoniy tayyorgarliklarini namoyon etdilar. Musobaqalar qizg‘in va murosasiz tarzda kechib, ishtirokchilarning g‘alabaga bo‘lgan intilishi, matonati va sportga bo‘lgan muhabbati yaqqol namoyon bo‘ldi.

Yakuniy natijalarga ko‘ra, g‘olib va sovrindorlar aniqlanib, ularga diplomlar hamda esdalik sovg‘alari tantanali ravishda topshirildi. 

Fursatdan foydalanib, musobaqaning respublika bosqichiga yo‘llanmani qo‘lga kiritgan barcha g‘oliblarni samimiy muborakbod etamiz. Ularning keyingi bosqichlarda ham yuqori natijalarga erishib, viloyatimiz sharafini munosib himoya qilishlarini tilab qolamiz. 

Farg‘ona viloyati vakilligi

Matbuot xizmati