Ishingizni pishiq qiling, zero Alloh taolo O'zini puxta qilish bilan vasflagan: “Bu har bir narsani puxta qiladigan Allohning san'atidir”(Naml surasi 88-oyat)

Puxtaliksiz qilingan ish rad etiladi. Alloh taoloning “U o'lim va hayotini sizlarning qaysilaringiz amalda yaxshiroq ekanligingizni sinash uchun yaratgandir”(Mulk surasi, 2-oyat) oyatini mufassir ulamolar: “Qay biringiz eng to'g'ri va eng xolis amal qilishingizni sinash uchun…”, deb tafsir qilishgan.

Puxtalik hech kim tepangizda kuzatib turmaganda ham ishni yaxshi shaklda bajarishdir. Har bir qilayotgan ishingizni mehr berib qiling, u ish qanchalik kichik bo'lsa ham. Mana shu muvaffaqiyat sirlaridan biridir. Nabiy sollallohu alayhi vasallam aytadilar: “Alloh ishni puxta qilishingizni xush ko'radi”.

Alloh taoloni xuddi ustingizda zikr qilib turganingizdek, ichingizda ham zikr qiling, sizni kuzatib turganini doim yodingizda tuting. Mana shu ishni pishiq qilish ustiga ixlosni ham qo'shish bo'ladi! Axir Alloh taolo aytadi-ku: “Sen: “Amal qilinglar! Bas, albatta, Alloh, Uning Rasuli va mo'minlar amalingizni ko'rarlar”, deb ayt”(Tavba surasi, 105-oyat).

Qachondir odamlardan xoli qolsangiz, bo'ldi xoli qoldim, demang. Bir kuzatuvchingiz bor!

O'zingizni tobora yaxshilab borishga harakat qiling. Zero, bu “Hisobga tortilishingizdan oldin, o'zingizni hisob-kitob qilingiz” hadisiga muvofiq pishiqlikka harakat qilish hisoblanadi.

Hayotdagi ba'zi taraqqiyot bosqichlarida ortda qolganimizning sababi ishimizda ixlos va puxtalik ruhini yo'qotganimizdir! Shunday ekan, ishingizni hech qachon tez bitirishga harakat qilmang, uni chiroyli bajarishga harakat qiling. Chunki odamlar sizdan qancha vaqtda bitirganingizni so'rashmaydi, balki uning pishiqligiga, sifatiga qarashadi.

Haqiqatan ham hozirgi kunimizda Islom diyorlaridagi ajablanarli holat – puxtalik va yuqori sifatga ega bo'lmagan uylarni ko'rayotganimizdir. Ko'priklar, uylar buzilib tushayotgani bejizga emas. Buning ikkita asosiy sababi bor: ishga jon berib, samimiy yondoshmaslik (xo'ja ko'rsinga qilish) va puxta qilmaslik.

Uylarning chidamsizligi va sifatsizligidan tortib, oddiy savdo-sotiqda tarozidan urib qolishgacha mana shu ikki omil asosiy rol o'ynaydi. Odamlarda ishiga sodiqlik, bajarayotgan ishini sidqidildan qilish degan narsalar tobora yo'qolib bormoqda. Hatto Payg'ambarimiz alayhissalom aytgan hadisdagi zamonga qolib ketdimmikin deb xavotir qilasan kishi: “Odamlarga shunday zamon keladiki, kishi molni haloldanmi, haromdanmi, qanday topayotganiga parvo qilmaydi”.

Doktor Hasson Shamsi Poshoning “Metin qoyalar” kitobidan

G'iyosiddin Habibulloh, Ne'matulloh Isomov tarjimasi.