Cavol: Bir hadisda: “Mening ummatimdan hisobsiz jannatga kiradiganlari bo'ladi. Ular bemor bo'lsalar, dam ham soldirmaydilar”, deyilgan ekan. Shunga dam soldirish ham gunohmi?

Javob: Bismillahir rohmanir rohiym. Siz so'ragan hadis mashhur sahobiy ibn Abbos roziyallohu anhumodan rivoyat qilingan bo'lib, unda Nabiy alayhissalom bunday deganlar: “Ummatimdan etmish mingi jannatga hisobsiz kirurlar. Ular shunday kimsalarki, dam solishni talab qilmaydiganlar va shumlanmaydiganlar hamda Robbilariga tavakkul qiladiganlardir” (Imom Buxoriy, Muslim va Termiziy rivoyati).

Mulla Aliy Qoriy rahimahulloh ushbu hadisning sharhida dam soldirish joizligiga dalolat qiladigan va dam solishdan qaytarilgan hadisi shariflarni keltirib, ularning har biri o'ziga xos ma'noga ega ekanini aytadilar. Ya'ni dam soldirish Qur'oni karim oyatlari, Alloh taoloning ismi sifatlari bilan arab tilida bo'lsa va odamlar shifoni Alloh taolodan deb bilsalar, bu ish joiz ekani, tavakkulga zid emasligi, jannatga hisobsiz kirishdan to'smasligini aytadilar. Lekin dam soldirish johiliyat odatlariga ko'ra bo'lsa, odamlar tushunmaydigan bir narsalar o'qilsa, odamlar shifo shu ruqyadan deb e'tiqod qilsa, bunday dam solish joiz emasligini bayon qilganlar. Vallohu a'lam.

 O'zbekiston musulmonlari idorasiFatvo markazi