1. Qattiq talab etiladi: Ayollar masjidi Nabaviyda Ravzaga kirgan vaqtda imkon qadar o'zlarini bosiq va vazmin tutishlari kerak. Hissiyotlarni jilovlash, ko'proq salovatlar, duolar qilish va asosiysi boshqa ziyoratchilarni ranjitmaslik talab etiladi.

Alloh taolo Qur'oni karimda keltiradi: “Ey iymon keltirganlar! Ovozingizni Payg'ambar ovozidan yuqori ko'tarmang va unga bir-biringiz ila so'zlashgandek dag'al so'z aytmang, o'zingiz sezmagan holda amallaringiz habata bo'lib qolmasin”(Hujurot surasi, 2-oyat). Alloh taoloning oyati karimasidagi bu ta'kid o'zini musulmonman degan har bir insonga tegishlidir.

1. Masjidun Nabaviydagi bir rakat namozning savobi ming rakat namozga, Masjidul Haromdagi bir rakat namozning savobi esa yuz ming rakat namoz savobiga tengligini doimo esda saqlab, vaqtni g'animat bilib, doimo ibodatda bo'lish kerak.
2. Ikkala Haramda ham sahar payti aytilgan birinchi azon tahajjud namozi uchun bo'ladi. Ikkinchi azon bomdod namozi uchunligini yodda saqlash kerak.
3. Haj muddati oz ekanligini hisobga olib, imkon qadar barcha namozlarni ikkala Haramda o'qishga harakat qilish kerak.
4. Ikkala Haramda o'qiladigan farz namozlariga imomga iqtido qilinadi.
5. Ruku va sajda tasbehlarini kamida 3 ta yoki 5, 7, 9, 11 marta aytish  mumkin (ikkala Haramda ruku va sajda uzoqroq bo'ladi).
6. Ikkala Haramda har namozdan  keyin 4 takbir bilan janoza namozi o'qiladi. Ayollar ham janoza namozini o'qishi mumkin.
7. Qazo namozlari bo'lsa, ikkala Haramda ham to'liq o'qiydi.
8. Imomdan oldinga o'tib ketmaslikka ham jiddiy e'tibor berish lozim.
9. Mehmonxona va Rasululloh sollallohu alayhi vasallamning masjidlari tashqarisidagi suvlardan ichishdan saqlanish. Chunki bu suvlar tahorat uchun bo'lib, ular iste'mol qilish uchun yaroqsiz sanaladi.
10. Hajga boruvchi ayollar ibodat vaqtida ulkan ajrlar berilishi bilan bir qatorda qilingan gunohlar ham ko'paytirib berilishini hisobga olib, birovlarning haqiga, moliga xiyonat qilmaslik, atrofdagilar bilan janjalmaslik, o'zi va boshqalar uchun savobli amallar qilishga harakat qilishi talab qilinadi.

 O'zbekiston musulmonlari idorasi

Fatvo markazi va Hotin-qizlar masalalari bo'yicha bo'limi