Alloh senga ravo ko'rganiga rozi bo'l! Ibn Mas'ud roziyallohu anhu aytadilar: “Alloh senga taqsimlab qo'yganiga rozi bo'l, odamlarning eng boyi bo'lasan. Alloh senga harom qilgan narsalardan chetlan, odamlarning eng taqvodori bo'lasan. Alloh senga farz qilgan narsalarni to'kis ado et, odamlarning eng obidi bo'lasan”.

Senga eng mehribon bo'lgan Zot ustidan senga rahm qilmaydiganlarga shikoyat qilma! Allohdan yordam so'ra, Allohga tayan, shunda Uning xos bandalaridan bo'lasan!

Uboda ibn Somit roziyallohu anhu aytadilar: “Odamlarning qo'lidagi narsadan umidingni butunlay uz, zotan shu haqiqiy boylikdir. Ta'magirlikdan, hojatlaringni odamlardan so'rashdan saqlan, zero, bu ayni faqirlikdir. Namoz o'qisang oxirgi namozingni o'qiyotgandek o'qi!”.

Endi bu haqda salaflarning hayotidan namunalarni keltirib o'tsak:

Zahabiyning “Tazkirotul huffoz” kitobida buyuk peshvolardan biri Imom Mansur ibn Zozon As-Saqafiy Al-Vositiy (131-hijriy yilda vafot etgan) rahimahullohning tarjimai holida bunday deydi: “Shogirdi Hushaym aytadi: U kishiga farazan: “O'lim farishtasi eshik tagida turibdi, deyilsa ham amalida ziyodalik bo'lmasdi” (ya'ni shundoq ham o'limi yaqin odamdek amal qilardi).

U kitobda yana Imom Mansur ibn Mo'tamir As-Sulamiy Al-Kufiy (132-hijriy yilda vafot etgan) rahimahullohning tarjimai holida bunday keladi: “Uning shogirdi Sufyon Savriy aytadi: Agar (ustozim) Mansurni namoz o'qiyotganini ko'rsangiz (shunchalik xushu' bilan o'qiyotganidan) hozir o'lib qolsa kerak, deb o'ylaysiz. Uning yana bir shogirdi Zoida ibn Qudoma aytadi: Mansur qirq kun ro'za tutdi, qirq tun qoim bo'lib, tuni bo'yi yig'lardi, tong otsa ko'ziga surma surib, chehrasini ochib, boshini yog'lab chiqardi. Onasi uni ko'p yig'laganini, qo'rquvini, Alloh taologa uzoq ibodat qilganini ko'rib, odam o'ldirib qo'ydingmi (bunchalar tavba-tazarru' qilasan)? – dedi. Shunda u aytdiki: “Nafsim nima qilganini o'zim bilaman!”.

Doktor Hasson Shamsi Poshoning “Metin qoyalar” kitobidan

G'iyosiddin Habibulloh, Ne'matulloh Isomov tarjimasi.