Bugun, 9 oktyabr' kuni O'zbekiston musulmonlari idorasi raisi, muftiy Shayx Nuriddin Holiqnazar hazratlari vodiy safari davomida Andijon viloyatidagi “Sayyid Muhyiddin maxdum” o'rta maxsus islom bilim yurtiga tashrif buyurdilar. Muftiy hazratlariga Andijon viloyati bosh imom-xatibi Mirzamaqsud domla Alimov va bilim yurti mudiri Rustamjon domla Mahmudov hamrohlik qildi.

Muftiy hazratlari bilim yurti pedagog-o'qituvchi va talabalarga yaratilgan shart-sharoitlar bilan yaqindan tanishdilar, xususan, u erdagi o'quv xonalari, dars jarayonlarini ko'zdan kechirib, ta'lim muassasasi faoliyatini yanada rivojlantirish borasida tavsiya va fikr-mulohazalarini bildirdilar.

Tashrif chog'ida Muftiy hazratlari muassasada talaba-yoshlar bilan muloqot qildilar. Suhbat asnosida tolibi ilmlarga barcha bilimlarni puxta egallashi, kelajakda etuk olim bo'lib etishishga astoydil harakat qilishi lozimligini ta'kidladilar. Shuningdek, Muftiy hazratlari talabalar bilan arab tili va fiqh fani bo'yicha savol-javob qildilar. Ushbu bilimlardagi talabalarning zakovati barchani mamnun etdi.

Shundan so'ng Muftiy hazratlari ta'lim muassasasida ustoz va shogirdlik maqomi haqida ilmiy suhbat qilib berish bilan birga, ustoz va talabalar haqqiga duoi xayr qildilar.

O'zbekiston musulmonlari idorasi
Matbuot xizmati