Dunyoning har kuni, har soati, har daqiqasi sinov. Talabaning ilmiy saviyasi imtihon qilinganidek, Rabbimiz ham bizlarni sinaydi. Bandalik imtihoni ham, ta'limi ham so'nggi nafasgacha davom etadi. Mo'min kishi har nafasini yaxshi ishlar bilan bezashi kerak.

Alloh azza va jalla bunday marhamat qiladi: “...(Shuningdek) Sizga aniq narsa (o'lim) kelguniga qadar Rabbingizga ibodat qilavering!” (Hijr surasi, 99-oyat).

Diplomni olsak, bu hujjat umrimiz so'n­gigacha foyda beradi. Bandalik esa bunday emas! Hech kimga “Oqibat albatta xayrli bo'­ladi” degan vasiqa berilmagan.

Alloh azza va jalla marhamat qiladi: “U kunda na mol va na farzandlar foyda bermas, faqat Alloh huzuriga sog'lom dil bilan kelgan kishilargagina (foyda berur)” (Shuaro surasi, 88–89-oyatlar).

Alloh huzuriga sog'lom qalb bilan bora olish uchun esa barcha jihatlarga e'tiborli bo'lish lozim. Jaloliddin Rumiy toza qalbni go'zal ta'riflaydi: “Ey yo'lchi! Tanang bir maktub kabidir. Unga diqqat bilan boq. U Alloh taoloning buyruq va qaytariqlarini bajaryaptimi, ya'ni yaratilish maqsadlariga muvofiqmi?

Bir burchakka o'tirib olib tafakkurga sho'n­g'i, maktubni, ya'ni o'zingni o'qi!

Agar maktubdagi yozuv – fe'l-atvoring va amallaring, ibodatlaring, xayru hasanot­laringga munosib bo'lmasa, uni yirtib tashla va qayta yozishga jasorat qidir! (Ya'ni tavba va istig'for qil, hayotingni taqvo asosida yangidan bunyod et!)”

Hech kim hurmat qilgan, e'zozlagan aziz insoniga yomonlikni ravo ko'rmaydi. Amal­larimizni Alloh taologa yorug' yuz bilan taqdim eta olishimiz uchun ularni taqvo bilan himoya qilishimiz lozim. Zero, “...(Qurbonlikni) Alloh aslida taqvoli kishilardan qabul qilur” (Moida surasi, 27-oyat), “...Oqibat (yaxshiligi) taqvo (ahli)gadir” (Toho surasi, 132-oyat). Yana Haq taolo marhamat qiladi: “...Allohga taqvo qilingiz va bilingizki, albatta, Alloh taqvodorlar bilan birgadir” (Baqara surasi, 194-oyat).

Mo'min kishi taqvoni qanday kasb qiladi?

Albatta, Payg'ambarimiz sollallohu alay­hi va sallamga ergashish orqali. Janobi Haq bizlarga namozning har rakatida Fotiha surasini o'qishimizni buyuradi. Har rakatda: “Bizni shunday to'g'ri yo'lga yo'llagin...” (Fotiha surasi, 6-oyat) deya Rabbimizga iltijo qilamiz.

Rabbimiz Payg'ambarimiz alayhissalomga xitoban: “(Siz) to'g'ri yo'ldadirsiz” (Yosin surasi, 4-oyat) deya amr etdi. Bundan anglashiladiki, eng to'g'ri yo'l Payg'ambarimiz alayhissalomning yo'llaridir. Shu sababli inson o'z hayotini Payg'ambar alayhissalomning hayotlari bilan taqqoslasa, qay darajada to'g'ri yo'lda ekanini anglab etadi.

Alhamdulillah, musulmonmiz. Alloh taolo bizlarga so'nggi nafasda iymon kalimasini aytishni buyuradi. Afsuski, oxirgi nafasimizni qanday berishimiz yolg'iz Allohga ayon... Shuning uchun ilohiy amrlarni qalbdan chuqur his etib, yuksak axloq bilan yashash lozim. Chunki so'nggi nafasda to'g'ri yo'ldan “toyib ketmaslik” shunga bog'liq. Zero, qalbda taqvo bo'lsa, namoz Rabbimiz xohlaganidek xushu bilan o'qiladi, sadaqa kibr qilmay beriladi, xizmat chin qalbdan ado etiladi.

Hushusiz o'qilgan namoz, oluvchiga minnat qilib berilgan sadaqa, qo'l uchida qilingan xizmat amal daftarimizga qora dog'dan boshqa iz qoldirishi mumkinmi?!

Shunday ekan, umrimizning har onini taqvo qilgan holda yashaylik. Toki, imtihon “baho”si a'lo bo'lsin! 

Nigora MIRZAYeVA

tayyorladi.