Millat ma'naviyatini isloh etish, odamlarni ma'rifatli qilish, olamga ochiq nazar bilan boqishga o'rgatish va mudroq tafakkurni uyg'otishning eng asosiy omili sifatida jadidchi bobolarimiz matbuotning qadrini baland ko'targanlar. Ular nazdida matbuot – fikrlar tilmochi, millat va el-yurt rivoji yo'lida xizmatchi, odamlar ongu shuurining quyoshi, har kimning vijdoniga tutilgan ko'zgu edi.

Bugun O'zbekiston musulmonlari idorasi Toshkent shahar vakilligida O'zbekiston musulmonlari idorasining "Shamsuddinxon Boboxonov" nashriyot-matbaa ijodiy uyi davriy nashrlari – "Hidoyat" va "Mo'minalar" jurnallari hamda "Islom nuri" gazetasiga 2023 yil obuna jarayonida faolik ko'rsatgan vakillarni taqdirlash, 2024 yil uchun obunani uyushqoqlik bilan tashkil etish yuzasidan yig'ilish o'tkazildi.

Tadbirda "Shamsuddinxon Boboxonov" nashriyot-matbaa ijodiy uyi Bosh muharriri Abdujalil Ho'jamov, Toshkent shahar bosh imom-xatibi Abduqahhor domla Yunusov, tumanlar bosh imom-xatiblari ishtirok etdi.

– Obuna jarayonida, avvalo, har bir imom-xatib o'zi namuna bo'lishi kerak, – dedi Toshkent shahar bosh imom-xatibi Abduqahhor domla Yunusov. – Poytaxtimizda faoliyat yuritayotgan 134 nafar imom-xatib, 265 nafar noib imom hamda 166 nafar otinoyi mazkur nashrlarni muntazam o'qib borishi kerak. Shu bilan birga, ushbu nashrlarda diniy soha xodimlari o'zlarining maqolalari bilan qatnashishi ham amri ma'ruf va nahyi munkar bo'ladi. Bir imom, deylik, juma kuni biror mavzuda mav'iza qilsa, uning ma'ruzasini 1,5 ming, 2 ming kishi eshitishi mumkin. Lekin birgina maqolasini yuz minglab odam o'qiydi, shuncha xonadonga nur kiradi, ziyo kiradi.

Tadbir so'ngida Hidoyat" va "Mo'minalar" jurnallariga hamda "Islom nuri" gazetasiga 2023 yil obuna jarayonida faolik ko'rsatgan imom-xatiblar nashriyot sovg'alari bilan taqdirlandi.

Yig'ilish so'ngida xayrli duolar qilindi.

O'zbekiston musulmonlari idorasi tasarrufidagi
"Shamsuddinxon Boboxonov" nashriyot-matbaa ijodiy uyi
Matbuot xizmati