Shu kunlarda Rossiya Federatsiyasi Sverdlovsk viloyati musulmonlari diniy boshqarmasi “Markaziy muftiylik” qarorgohida muftiy Abdulquddus Asharin boshchiligidagi Ural musulmonlarining O'zbekiston Respublikasi delegatsiyasi bilan uchrashuvi bo'lib o'tdi, deb yozadi “IslamNews”.

  O'zbekistondan tashrif buyurgan delegatsiya vakillaridan O'zbekiston Respublikasi musulmonlari idorasi Halqaro aloqalar bo'limi mudiri o'rinbosari Ibrohim Inomov, Andijon viloyatidagi “G'ishtli” jome masjidi imom-xatibi Botirjon Tojiboyev, Rossiya Federatsiyasi, Yekaterinburg shahridagi O'zbekiston Respublikasi Bosh konsuli vazifasini bajaruvchisi Samandar Yuldashev va O'zbekistonning Yekaterinburg shahridagi konsuli Ulug'bek Hallakov mazkur yig'ilishda qatnashdilar. Yig'ilishda mezbonlar tomonidan Sverdlovsk viloyati Halqaro va tashqi iqtisodiy aloqalar vazirligining 1-xalqaro bo'limi etno-iqtisodiy aloqalar va konfessiyaviy munosabatlar bosh mutaxassisi Pavel Kox va Sverdlovsk viloyati ichki siyosat boshqarmasining ekstremizmning oldini olish bo'yicha ishlarni tashkil etish bo'limi boshlig'i Ivan Paderin ishtirok etdi.

O'zbekiston delegatsiyasi O'zbekiston musulmonlari idorasi raisi, muftiy, Shayx Nuriddin Holiqnazar hazratlarining Ural musulmonlariga salom va duolarini etkazishdi. O'zbekiston imom-xatiblari delegatsiyasining Ural musulmonlari diniy idorasi taklifiga binoan dindoshlariga yot g'oyalar tashviqotiga qarshi profilaktika chora-tadbirlarini amalga oshirish bo'yicha Yekaterinburgga tashrifi bilan boshlangan bugungi hamkorlikdan mamnunligini bildirdi.

Muftiy Abdulquddus Asharin mehmonlar uchun Markaziy muftiylik qarorgohi bo'ylab tashrif uyushtirdi va Yekaterinburgda markaziy jome masjidi qurilishi rejalari haqida so'zlab berdi.

 Tomonlar O'zbekistondagi qadamjolarga safar qilish orqali ziyorat turizmini rivojlantirish, O'zbekiston va Ural musulmonlari o'rtasidagi do'stona aloqalarni mustahkamlash, qo'shma ta'lim tadbirlari bo'yicha istiqbolli loyihalarni muhokama qildi.

O'zbekiston musulmonlari idorasi

Matbuot xizmati.