Mavlid bayramlari o'tkazilayotgan ayni bir paytda Muhammad ibn Ahmad al-Beruniy o'rta maxsus islom bilim yurtida "1-oktyabr' – Ustoz va murabbiylar kuni" munosabati bilan "Sizga ta'zim, ustozlar!" nomli tadbir bo'lib o'tdi. Unda Qoraqalpog'istonda diniy-ma'rifiy sohada uzoq yillar davomida xizmat qilgan faxriy ustozlar, ishchi xodimlar, faxriy imom-xatiblar, bilim yurtining o'qituvchi-ustozlari va talaba yoshlari ishtirok etdi.

Bugungi tadbirni o'tkazishdan asosiy maqsad, muhtaram ustozlarni, diniy ta'lim sohasining faxriylarini e'zozlash, hurmat ko'rsatish, qolaversa, talaba yoshlarga ularning ibratli hayot yo'lini tanishtirish va xayrli duolarini olishdan iborat.

Tadbirni bilim yurti mudiri Sh.Bahouddinov ochib berdi va yig'ilganlarni mavlidi sharif bilan, qolaversa, "1-oktyabr' – Ustoz va murabbiylar kuni" bayrami bilan tabrikladi.

Bayram tadbirida uzoq yillardan buyon xizmat qilib kelayotgan bilim yurtining bir qator o'qituvchi-ustozlari diniy ta'lim sohasidagi samarali faoliyati uchun O'zbekiston musulmonlari idorasi tomonidan maqtov yorlig'i bilan taqdirlandi. Shuningdek, Qoraqalpog'iston musulmonlari qoziyoti tomonidan yurtimizda diniy-ma'rifiy sohada xizmat qilgan faxriy mehmonlarga bayram munosabati bilan "Ardoqli ustoz" turkumi asosida minnatdorchilik xati va esdalik sovg'alari topshirildi. Shundan so'ng mehmonlar bayram dasturxoniga taklif qilindi.

Talabalar tomonidan ijro etilgan nashidlar, she'r va monologlar, o'qilgan salovat va mavlidlar tadbirga o'zgacha fayz-shukuh bahsh etdi.

Fayzli bayram tadbiri yakunida nuroniy ustozlar va faxriy mehmonlar bilim yurtining ustoz-murabbiylari hamda talaba yoshlar haqqiga xayrli duolar qildi. Jumladan, bugungi tinch-osoyishta va farovon turmushga shukrona o'laroq, talaba yoshlarga ilm-bilim olishda shijoat va g'ayrat qilish kerakligini ta'kidladi.

Bilim yurti
Matbuot xizmati