Shu yil 1 fevral' kuni Toshkent shahrida Vazirlar Mahkamasi huzuridagi Imom Buxoriy xalqaro ilmiy-tadqiqot markazi tomonidan nashrga tayyorlangan yangi kitob va risolalar taqdimoti o'tkazildi.  

Tadbirda Prezident Administratsiyasi mas'ul xodimi Jasur Najmiddinov, O'zbekiston musulmonlari idorasi raisi o'rinbosari Jaloliddin domla Hamroqulov, O'zbekiston xalqaro islom akademiyasi rektori Uyg'un G'afurov, O'zbekistondagi islom tsivilizatsiyasi markazi direktori o'rinbosari Firdavs Halimov, hamkor tashkilot va ilmiy doira vakillari hamda Markaz ilmiy xodimlari ishtirok etdi.

Marosimda Markaz tomonidan 2023 yilda nashrga tayyorlangan Imom Buxoriyning “At-Tarixus sag'ir”, Abu Ja'far Muhammad ibn Abu Hotim Varroq Buxoriyning “Shamoili Buxoriy”, Abu Azabaning “Ar-Ravzatul bahiyya fiyma baynal asho'ira val moturidiyya”, Imom Dorimiyning “Sunani Dorimiy”, Alouddin Kosoniyning “Kosoniy aqidasi”, Sayyid Abdulmojid G'avriyning “Hadis ilmi istilohlari entsiklopediyasi” asarlari, shuningdek, “Islom dinida tinchlik” va “G'uluvning xatarlari” nomli risolalar taqdim etildi.

Taqdimotning ochilishida so'zga chiqqanlar Imom Buxoriy va boshqa alloma ajdodlarimiz merosini o'rganishning ahamiyati, taqdim etilayotgan kitoblarning ilmiy qiymati, mutafakkirlar asarlarini tadqiq etish borasidagi ishlarning hozirgi holati va istiqboldagi vazifalar, shuningdek, Yangi O'zbekistonda diniy-ma'rifiy sohada olib borilayotgan islohotlar haqida batafsil to'xtaldi.

Al-Azhar islom tadqiqotlari majmuasi Bosh kotibi, doktor Muhammad Nazir Ayyad hamda Islom tarixi, san'ati va madaniyatini tadqiq qilish markazi (IRCICA) Bosh direktori, professor Mahmud Erol Qilich videotabrik yo'lladi.

Darhaqiqat, Imom Buxoriy xalqaro ilmiy-tadqiqot markazi tomonidan nashrga tayyorlangan yangi kitob va risolalar islomning asl qadriyat va tamoyillarini hamda insonparvarlik g'oyalarini tarannum etishda, zamonlar osha yuksak qadr-qimmatini yo'qotmay kelayotgan asarlarning tub mohiyatini ochib berishda muhim dasturulamaldir. Ona tilimizda chop etilgan mazkur asarlar mutafakkirlarimiz ilmiy qarashlari ma'nosini yanada yaxshiroq anglashga, ular ta'limotini yanada teran idrok etishga asos bo'lib xizmat qiladi. 

O'zbekiston musulmonlari idorasi

Matbuot xizmati