Bugun, 28 sentyabr' kuni Mir Arab oliy madrasasida “Buxoroning Islom ilmlari rivojidagi o'rni” mavzusida xalqaro ilmiy-amaliy anjuman bo'lib o'tdi. Tadbirda Din ishlari bo'yicha qo'mita va O'zbekiston musulmonlari idorasining mas'ul xodimlari, O'MI Buxoro viloyati vakili, yurtimizda faoliyati yuritayotgan bir qator xalqaro ilmiy-tadqiqot markazlarining ulamolari, diniy ta'lim muassasalarining ustoz va talabalari ishtirok etdi.

Tadbirni Oliy madrasa rektori Jobir domla Elov kirish so'zi bilan ochib, tadbir qatnashchilarining anjumandagi ishtiroki uchun minnatdorlik bildirib, Buxoroning Islom dini rivojidagi ahamiyati haqida so'z yuritdi.

So'ng Imom Buxoriy xalqaro ilmiy-tadqiqot markazi direktori, tarix fanlari doktori Shovosil Ziyodov yig'ilganlarga “Buxoro Islom ilmlari rivojida Muhammad Porso kutubxonasining o'rni” mavzusida noyob ma'lumotlar asosida ma'ruza qildi.

Halqaro anjuman davomida Imom Moturidiy xalqaro ilmiy-tadqiqot markazi bosh ilmiy xodimi, falsafa fanlari doktori Shayx Ahmad Sa'd Damanhuriyning “Buxoroning Islom ulamolarini etishtirib chiqarishdagi hissasi” mavzusidagi chiqishlari barchani qiziqishiga sabab bo'ldi.

Tadbirda Hadis ilmi maktabida ta'lim berayotgan Misr Arab Respublikasi “Al-Azhar” universiteti katta o'qituvchisi Shayx Jamoliddin Hoshim Mahmudning “Buxoro faqihlarining fiqh rivojidagi o'rni” haqidagi ma'ruzasi ko'pchilikning e'tiboriga tushdi.

Shuningdek, Buxoro davlat universitetida ta'lim berayotgan Misr Arab Respublikasi “Al-Azhar” universitetining professori, manbashunos, tilshunos olim, professor Ayman Usmon “Islomda bag'rikenglik madaniyati” mavzusidagi chiqishi ham nihoyatda manfaatli bo'ldi.

Anjumanda davomida Mir Arab oliy madrasasida ta'lim berayotgan Misr Arab Respublikasi “Al-Azhar” universitetining usulid din fanlari doktori Shayx Ahmad Rajab Ahmad Adavi “Imom Buxoriy – Buxoro faxri” hamda “Al-Azhar” universitetining usulid din fanlari doktori Shayx Ahmad Muhammad Ali “Buxoro ulamolarining musulmonlarga fazlu marhamati” mavzusida ma'ruza qildi.

Anjuman yakunida konferentsiya barcha uchun manfaatli bo'lgani e'tirof etilib, barcha ishtirokchilarga tashkilotchilar tomonidan minnatdorlik bildirildi.

O'zbekiston musulmonlari idorasi
Matbuot xizmati