وَإِذَا لَقُواْ ٱلَّذِينَ ءَامَنُواْ قَالُوٓاْ ءَامَنَّا وَإِذَا خَلَا بَعۡضُهُمۡ إِلَىٰ بَعۡضٖ قَالُوٓاْ أَتُحَدِّثُونَهُم بِمَا فَتَحَ ٱللَّهُ عَلَيۡكُمۡ لِيُحَآجُّوكُم بِهِۦ عِندَ رَبِّكُمۡۚ أَفَلَا تَعۡقِلُونَ٧٦

76. Va mo‘minlar bilan uchrashib qolishsa: "Imon keltirdik" deyishardi. O‘zlari xoli qolishganda esa: "Ular Parvardigoringiz huzurida hujjat talashishlari uchun Alloh sizlarga ochgan narsa haqida ularga gapiryapsizlarmi, aqlni ishlatmaysizlarmi?" deyishar edi.

Yahudiylardan ba’zi munofiqlar o‘z Kitoblarida keltirilgan Payg‘ambarimiz Muhammad alayhissalom tavsiflarini musulmonlarga xushomad tariqasida bayon qilib berishardi. Boshqa yahudiylar bundan xavotirga tushib: "Kitobingizdagi dalil-isbotlarni nega musulmonlarga bildiryapsiz, ular vositasida musulmonlar sizlarni mag‘lub qilishadi-ku!", deya o‘sha munofiqlarga e’tiroz bildirishar edi. Munofiq yahudiylardan bo‘ladimi, musulmonlardan bo‘ladimi, ularning dilidagi nifoq bir xil bo‘ladi, ustlari bir narsani gapirishsa, ichlarida boshqa narsani dillab turgan bo‘lishadi. Bu ochiq-oydin ikkiyuzlamachilikdir, munofiqlar aslo ishonchga sazovor bo‘lmasliklari belgisidir.

أَوَ لَا يَعۡلَمُونَ أَنَّ ٱللَّهَ يَعۡلَمُ مَا يُسِرُّونَ وَمَا يُعۡلِنُونَ٧٧

77. Alloh ularning yashirgan va oshkor qilgan narsalarini bilib turishini bilishmasmikin?

Alloh taolo insonlarning dilidagiyu xayolidagi narsalargacha, ularning xoh pinhon, xoh oshkora qilgan hamma qilmishlarini ko‘rib-bilib turadi. Bu haqda Qur’oni karimning juda ko‘p oyatlari xabar beradi: "Dilingizdagi narsani xoh yashiring, xoh oshkor qiling, Alloh uni biladi. Osmonlaru Yerdagi narsalarni ham biladi" (Oli Imron, 29); "Alloh albatta ko‘ngillar sirini biluvchidir" (Moida, 7); "Alloh sir tutganu oshkor qilgan narsalaringizni biladi" (An’om, 3); "Albatta U dillardagi sirlarning biluvchisidir" (Hud, 5). Yahudiylarning shunday "olim"lari bor ediki, ular o‘zlariga nozil qilingan Kitobni o‘z manfaatlari yo‘lida o‘zgartiribgina qolmay, ilohiy vahiylarni o‘zlarining talqinlari, milliy tarixlari, turli irim-sirimlar, o‘zlari o‘ylab topgan ta’limotlar, falsafiy mushohadalar va qonunlar bilan buzib yuborishdi. Ular ana shu tayini yo‘q yozuvlarni Parvardigor kalomi sifatida taqdim etishdi va har bir yahudiyni bularga ishonishga majburlashdi. Axir, Alloh taolo ularning xoh oshkora, xoh yashirin qilgan barcha ishlariniyu dillaridagi g‘arazlarigacha yaxshi bilib turishini anglashmasmikin?!