Karantinda kimlar ro‘za tutmasligi mumkin?
25.04.2020
3730
2 min.
Har yili yurtdoshlarimiz muborak Ramazon oyini o‘zgacha tayyorgarlik va xursandchilik bilan kutib oladi, ko‘tarinki kayfiyatda o‘tkazadi.
Bu yil muborak kunlar sinovli davrga to‘g‘ri keldi. Shu sabab xalqimiz orasida ro‘za tutish bilan bog‘liq turli gap-so‘zlar yuribdi. Vaholanki, O‘zbekiston musulmonlari idorasi Ulamolar kengashining Ramazon oyini o‘tkazish haqidagi bayonotida bu haqda aniq ma’lumotlar berilgan edi.
Ijtimoiy tarmoqlardagi bu kabi mulohazalarga yana bir bor oydinlik kiritish maqsadida O‘zbekiston musulmonlari idorasi raisining birinchi o‘rinbosari Homidjon Ishmatbekovga murojaat qildik.
– Karantin vaqtida ro‘za tutish taqiqlanadi, degan gapga hech qanday asos yo‘q. Aslida, shariatimizda ayrim toifa kishilar ro‘za tutmasligiga ruxsat berilgan. Bular – keksa kishilar, ya’ni qariligi sabab ro‘za tutishga holi yo‘q, kundan-kunga jismonan zaiflashib borayotgan yoshi ulug‘ keksalar va surunkali kasallikka mubtalo bo‘lgan birodarlarimiz, ro‘za tutish salomatligiga jiddiy ziyon yetkazishi mumkin bo‘lgan bemorlar.
Bunday kishilar ro‘za tutmagani evaziga Ramazon oyining har bir kuni uchun fidya berishi lozim bo‘ladi. Bu haqda Alloh taolo Qur’oni karimda bunday marhamat qilgan:
وعَلَى الَّذِينَ يُطِيقُونَهُ فِدْيَةٌ طَعَامُ مِسْكِينٍ فَمَنْ تَطَوَّعَ خَيْرًا فَهُوَ خَيْرٌ لَهُ
ya’ni: “(Ro‘za tutishga) madori yetmaydiganlar zimmasida bir miskin kimsaning (bir kunlik) taomi fidyadir. Kimki ixtiyoriy ravishda ziyoda xayr qilsa (lozim bo‘lganidan ortiq fidya bersa), o‘ziga yaxshi.” (Baqara surasi, 184-oyat).
Bundan tashqari, vaqtincha bemor bo‘lib turgan yoki safarga chiqqan kishilar ham bemorlik va musofirlik kunlarida ro‘za tutmasligi mumkin. Faqat, bemor sog‘ayganidan so‘ng va musofir safardan qaytganidan keyin tutmagan kunlarining o‘rniga qazosini tutib berishi shart bo‘ladi.
Karantin davrida qo‘llarni tez-tez yuvish, antiseptik vositalardan foydalanish ro‘zani tutmaslikka asos bo‘la olmaydi. Chunki, bu ishlar ro‘zani ochmaydi. Shuningdek, zarurat bo‘lsa vaqti-vaqti bilan og‘izni chayqab turishning ham zarari yo‘q. Faqatgina, og‘iz chayqalganda g‘arg‘ara qilinmaydi, ya’ni tomoqdan ichkariga suv o‘tkazmaslik kerak. Aks holda ro‘za ochiladi.
Shifokorlar tomonidan karantin davrida ro‘za tutish koronavirusga chalinishga olib keladi va u orqali halok bo‘lish xavfini kuchaytiradi, deyilgan taqdirda va bu narsa ilmiy jihatdan o‘z tasdig‘ini topganda, ro‘za tutmaslik mumkin bo‘ladi.
Muhayyo Toshqorayeva, O‘zA
MА`LUMOTNI IJTIMOIY TАRMOQLАRDА ULАSHING
Iymon 
Namoz 
Ro'za 
Zakot 
Haj 
Qur'on 
Islom saboqlari 
Aloqa 
