Samimiy muloqot
2023 yil 7 sentyabr' kuni O'zbekiston musulmonlari idorasi raisi, muftiy Shayx Nuriddin Holiqnazar hazratlari Arman-Apostollik cherkovining Moskva va Novonaxichevan eparxiyasi rahbari Yezras Narsesyanni qabul qildilar.
Muloqotda Din ishlari bo'yicha qo'mita raisi o'rinbosari Dilshod Mamatqulov, O'zbekistondagi Arman Apostol cherkovi ruhoniysi Avanes Grigoryan va bir qator mutasaddilar ishtirok etdi.
Uchrashuvda qadim-qadimdan O'zbekiston zaminida turli millat, elat va din vakillari ahil-inoq yashab kelayotgan diyor ekani, barchaning asosiy maqsadi tinchlik va osoyishtalikni ta'minlash va ertangi taraqqiyoti uchun hissa qo'shish ekaniga urg'u qaratildi.
Samimiy ruhda o'tgan suhbatda mamlakatimizdagi yangilanish va islohotlar keng quloch yozayotgani, Davlatimiz rahbari tomonidan millatlararo totuvlik va konfessiyalararo hamkorlikka berilayotgan alohida e'tibor mamlakatimiz taraqqiyotida yangi davrni boshlanishiga zamin yaratganiga alohida e'tibor qaratildi.
Yurtimizdagi bunday ijobiy o'zgarishlar dunyo hamjamiyatida O'zbekistonga bo'lgan qiziqishni yanada oshirib, uning xalqaro maydondagi nufuzini tobora mustahkamlayotgani mehmonlar tomonidan yuksak e'tirof etildi.
O'zbekiston musulmonlari idorasi Matbuot xizmati
Malayziyalik sayyohlarni O‘zbekistonga jalb qilish bo‘yicha yangi tashabbuslar muhokama qilindi
O‘zbekiston elchixonasida mamlakatimizning turizm salohiyatiga bag‘ishlangan uchrashuv tashkil etildi, deb xabar bermoqda “Dunyo” AA.
Tadbirda Malayziyaning “MATTA” va “BUMITRA” sayyohlik kompaniyalari rahbariyati, mahalliy turoperatorlar, “Uzbekistan Airways” aviakompaniyacining Kuala-Lumpurdagi vakillari ishtirok etdi.
Malayziyalik ishtirokchilarga O‘zbekistonda turizm sohasida amalga oshirilayotgan keng ko‘lamli islohotlar, xorijiy sayyohlar uchun qulay shart-sharoitlar yaratish bo‘yicha ko‘rilayotgan chora-tadbirlar haqida ma’lumot berildi.
Elchixona diplomatlarining ta’kidlanishicha, hozirda vizasiz rejim 94 dan ortiq davlat, jumladan, Malayziya fuqarolari uchun amal qilmoqda.
O‘zbekiston sayyohlik kompaniyalari Samarqand, Buxoro, Xorazm va Toshkent bo‘yicha dasturlar, ziyorat, tarixiy-madaniy, qishki, MICE va gastronomik turizm yo‘nalishlari bo‘yicha sayyohlik paketlarini taqdim etdi.
“Uzbekistan Airways” vakillari Toshkent va Kuala-Lumpur o‘rtasidagi to‘g‘ridan to‘g‘ri aviaqatnovlar haqida ma’lumot berdi. Qish mavsumida O‘zbekiston va Malayziya o‘rtasidagi to‘g‘ridan to‘g‘ri reyslar sonini haftasiga ikkitadan to‘rttagacha oshirish rejalashtirilgan.
Ishtirokchilar to‘g‘ridan to‘g‘ri aviaqatnovlarning kengayishi Markaziy va Janubi-Sharqiy Osiyo o‘rtasidagi sayyohlar oqimining o‘sishiga xizmat qilishini ta’kidladi.
B2B formatidagi muzokaralar chog‘ida O‘zbekistonga sayyohlar oqimini oshirish, Malayziyada ziyorat, qishki va MICE turizmi yo‘nalishlari bo‘yicha sayyohlik paketlari savdosini kengaytirish yuzasidan kelishuvlarga erishildi.
O‘zbekiston musulmonlari idorasi Matbuot xizmati