O'zbekiston xorijlik ziyoratchilarni jalb qilmoqda
O'zbekistonning Londondagi elchixonasida Buyuk Britaniyaning “Halal Travel Guide” sayyohlik kompaniyasining ijrochi direktori Sumayya Hamdi bilan uchrashuv bo'lib o'tdi, deb xabar bermoqda “Dunyo” axborot agentligi muxbiri.
Uchrashuvda Buyuk Britaniyadagi musulmonlar o'rtasida mamlakatimizning ziyorat salohiyatini keng targ'ib qilish, sayyohlik mazmunini, sayyohlar uchun qiziqarli va yangi yo'nalishlarni rivojlantirish yuzasidan fikr almashildi.
Sumayya Hamdi Samarqand, Buxoro va Hiva shaharlarida islomiy obidalar, madaniy obidalar, sayyohlar uchun yaratilgan sharoitlar, shubhasiz, Buyuk Britaniya musulmon dunyosi vakillarida qiziqish uyg'otayotganini ta'kidladi.
Tomonlar ushbu sayyohlik kompaniyasi ko'magida 2024 yilda O'zbekistonga 500 dan ortiq britaniyalik sayyohni jalb etish, shuningdek, “Keyingi halol yo'llanmani top” ko'rgazmasida “O'zbekiston – 2024 yilda musulmon sayyohlar uchun eng yaxshi yo'nalish” mavzusida forum o'tkazishga kelishib oldi.
Mazkur forum shu yilning 24-25 fevral' kunlari Londonda o'tkazilishi reja qilinmoqda.
Ma'lumot uchun, “Halal Travel Guide” - Buyuk Britaniyadagi nisbatan yangi turoperatorlar guruhi bo'lib, 2017 yilda tashkil etilgan bo'lib, u asosan 25 yoshdan 41 yoshgacha bo'lgan sayyohlarga xizmat ko'rsatadi.
O'zbekiston musulmonlari idorasi
Matbuot xizmati
TIVda Indoneziya, Malayziya va Singapurdan O‘zbekistonga ko‘proq sayyohlarni jalb qilish masalalari muhokama qilindi
13 iyul kuni Tashqi ishlar vazirligida davlatimiz rahbarining 2021 yil 9 fevraldagi “O‘zbekiston Respublikasida ichki va ziyorat turizmini yanada rivojlantirish chora-tadbirlari to‘g‘risida”gi farmoni hamda Vazirlar Mahkamasining 2026 yil 9 yanvardagi “Umra plyus” ziyorat turizmi dasturini amalga oshirishga qaratilgan qo‘shimcha chora-tadbirlar to‘g‘risida”gi qarori ijrosini ta’minlash doirasida Indoneziya, Malayziya va Singapurdan mamlakatimizga tashrif buyurayotgan sayyohlar oqimini kengaytirishga qaratilgan yig‘ilish bo‘lib o‘tdi, deb xabar qilmoqda “Dunyo” AA muxbiri.
TIV ma’lumotiga ko‘ra, gibrid formatda tashkil etilgan ushbu yig‘ilishda O‘zbekiston Turizm qo‘mitasi, Din ishlari bo‘yicha qo‘mitasi, Texnik jihatdan tartibga solish agentligi, Buxoro, Samarqand viloyatlari va Toshkent shahri hokimliklari, “Uzbekistan Airways” AJ, “Uzbekistan Airports” AJ, mahalliy aviatashuvchi kompaniyalar, “Uzbekistan–Malaysia–Indonesia Travel Association”, “Umra ziyoratlari sayyohlik agentliklari assotsiatsiyasi”, shuningdek, turistik kompaniyalarning 40 nafarga yaqin vakillari ishtirok etishdi.
Yig‘ilishda Janubiy-Sharqiy Osiyo davlatlaridan O‘zbekistonga sayyohlar oqimini oshirish yo‘lidagi transport-logistika, xizmat ko‘rsatish va targ‘ibot masalalari atroflicha muhokama qilindi. Xususan, Malayziyadan qatnovlarni ko‘paytirish hamda Indoneziya va Singapurdan to‘g‘ridan to‘g‘ri aviareyslarni yo‘lga qo‘yish, “Umra+” dasturi doirasida ziyorat turizmi bo‘yicha targ‘ibot ishlarini jadallashtirish, xorijiy ziyoratchilar uchun infratuzilmani xalqaro halol standartlariga moslashtirish va sayyohlik kompaniyalar bilan ushbu yo‘nalishda olib borilayotgan ishlarni muvofiqlashtirish masalalari muhokama qilindi.
Tadbir “muammo-taklif-yechim” formatidagi ochiq muloqot ko‘rinishida bo‘lib o‘tdi va unda tomonlar sohadagi muammo hamda mavjud imkoniyatlar yuzasidan konstruktiv fikr almashishdi.
O‘zbekiston musulmonlari idorasi Matbuot xizmati
